Navoiy viloyatida qo‘lbola usulda tayyorlangan portlovchi moddalarning muomalaga kiritilishining oldi olindi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Navoiy viloyati boshqarmalari tomonidan IIB xodimlari bilan hamkorlikda tezkor tadbir o‘tkazilgan. Tadbirda Sh.A. ismli shaxs fuqaro K.H.ga oltin konlarida noqonuniy ravishda oltin zarrachalari mavjud qumlarni qazib olishda portlatish va oltin qazib olish ishlariga “sherik” sifatida qo‘shish evaziga, portlovchi moddalardan qo‘lbola usulda tayyorlangan 14 dona qurilmani bergan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 248-moddasi (o‘qotar qurolning, o‘q-dorilarning, o‘qotar qurol asosiy moddalarning, portlash vositalarining yoki portlash qurilmalarining qonunga xilof muomalasi) bilan jinoyat ishi qo‘zg‘atilib, tergovga tegishliligi bo‘yicha yuborilgan.
Bir necha kun oldin DXX oltin qazib olish uchun sharoit yaratib berish evaziga fuqarodan 30 ming dollar talab qilgan Navoiy viloyati Tomdi tumani ichki ishlar bo‘limi profilaktika inspektorini qo‘lga olgandi. Undan oldin Samarqandda noqonuniy ravishda oltin qazib olish bilan shug‘ullangan yana bir guruh kishilar ushlangan edi.
Izoh (0)