Ўзбекистонда тадбиркорларни олдиндан огоҳлантирмасдан ёнғин хавфсизлиги талабларига риоя этиши юзасидан текширув ўтказиш мумкин бўлади.
2 август куни имзоланган президент фармонига кўра, эндиликда давлат ёнғин назорати органлари ёнғин хавфсизлиги талабларига риоя этилиши юзасидан текширув ўтказилиши ҳақида тадбиркорлик субъектларини олдиндан хабардор қилиши шарт эмас.
Ёнғин хавфсизлиги талабларига риоя этилиши юзасидан бир йилда бир марта батафсил ва назорат текшируви ўтказилади. Юридик ёки жисмоний шахслар мурожаатлари, ОАВ ва бошқа манбалардан олинган маълумотлар асосида ҳам тезкор текширув ўтказилади.
Ҳужжатда қайд этилишича, бу ёнғинларнинг олдини олиш ва уларнингкелиб чиқиш сабаблари ва омилларини барвақт аниқлаш, бартараф этиш ҳамда бу борада давлат назоратини янада кучайтириш мақсадида амалга оширилмоқда.
Эслатиб ўтамиз, 29 июль куни Фарғона шаҳридаги тўрт қаватли бинонинг ертўласида жойлашган караоке кафесида олти кишининг ўлими, етти кишининг турли даражадаги тан жароҳатлари олишига сабаб бўлган ёнғин содир бўлганди.
Шу куни Фавқулодда вазиятлар бошқармаси биносида вилоят ишчи гуруҳи ҳамда штаб ташкил қилинганди. Тузилган 25 та ишчи гуруҳнинг ҳар бирига 11 нафардан мутахассислар бириктирилиб, ва Фарғона шаҳридаги 73 та маҳалла фуқаролар йиғинлари ҳудудидаги кўп қаватли турар жой биноларининг ертўла қисмида тадбиркорлар томонидан ташкил этилган савдо ва маиший хизмат кўрсатиш шохобчалари, ўқув марказлари, кўнгилочар сервис шохобчаларининг ёнғин хавфсизлиги ва санитария ҳолатини хатловдан ўтказиш белгиланганди.
Изоҳ (0)