Markaziy bank nomidan kredit taklif etib, odamlar kartasidan pul yechib olayotgan firibgarlar yana faollashgani aytilmoqda

Firibgarlar endi Markaziy bank xodimi sifatida o‘zlarini tanishtirib, fuqarolarning ishonchiga kirishga urinayotgani aytilmoqda. Bu haqda iqtisodchi Otabek Bakirov Telegram’dagi kanalida xabar berdi.

“Markaziy bank nomidan Telegram’da ochilgan “Markaziy_Banki_uz” soxta kanalida fuqarolarga onlayn kreditlar taklif etib, ularning bank kartalariga oid maʼlumotlarini qo‘lga kiritish orqali bank kartasidagi pul mablag‘larini o‘zlashtirish holatlari kuzatilayotgani qayd etilgan. Bu kabi xabar va foydalanuvchilarga Markaziy bankning hech qanday aloqasi yo‘q. Esda tuting: Markaziy bank jismoniy shaxslarga kreditlar ajratmaydi va moliyaviy xizmatlar ko‘rsatish bilan shug‘ullanmaydi”, — deb yozadi iqtisodchi.

Markaziy bank mobil telefonga kelgan bir martalik SMS-kod, mobil ilovalar, veb-ilovalarga kirish huquqini beruvchi login va parollar bank xodimlari tomonidan so‘ralmasligi, shu bois hech kimga bunday maʼlumotlarni bermaslik zarurligi to‘g‘risida doimiy ogohlantirib keladi.

Shunga qaramay, fuqarolar orasida firibgarlarning psixologik taʼsiriga tushib, aldanib qolish holatlari uchramoqda.

“Qo‘l telefoningizga qo‘ng‘iroq qilib, o‘zini Markaziy bank, tijorat banki, to‘lov tashkiloti yoki to‘lov tizimi operatorining nomidan xavfsizlik, plastik karta, mijozlarni qo‘llab-quvvatlash yoki boshqa bo‘lim xodimi deb tanishtirib, mobil ilovangiz buzilgani, bank kartangiz blok holatiga tushgani, kartadan noqonuniy pul yechib olishga urinishlar bo‘layotgani va shu kabi turli uydirmalarni keltirgan holda darhol chora ko‘rilmasa, barcha mablag‘lardan ayrilishi haqida aytib, firibgarlar tomonidan ijtimoiy injeneringni qo‘llagan holda turli psixologik bosim o‘tkazishga urinish holatlari shular jumlasidandir. Markaziy bank turli firibgarlik yo‘li bilan bank kartalaridagi pul mablag‘lari yechilishiga yo‘l qo‘ymaslik maqsadida fuqarolarimizni ogohlantiradi”, — deya bayonot berib keladi tashkilot.

Bank kartalari egalariga telefonga kelgan bank kartalari bilan bog‘liq bir martalik yuborilgan SMS-kodni, tijorat banklari, to‘lov tizimi operatorlari va to‘lov tashkilotlarining mobil ilovalariga kirish huquqini beruvchi login va parollarni hech kimga aytmaslik tavsiya etiladi.