Makroiqtisodiy va hududiy tadqiqotlar instituti mutaxassislari 2023-yilning II choragi uchun Olx.uz platformasida taklif etilayotgan uy-joy narxlarini hududlar (115 ta hudud) bo‘yicha guruhlab chiqdi.
Institutning “Daryo”ga maʼlum qilishicha, aprel-iyun oylari davomida hududlar bo‘yicha 432 ming 893 ta maʼlumot to‘plangan va interaktiv veb sahifa ko‘rinishiga keltirilgan.
“Viloyatlar bo‘yicha uy-joyning har bir kvadrat metri uchun narxlar 10 guruhga ajratildi. Narxlar eng arzon hududlar birinchi guruhga (har bir kvadrat metr uchun 390 dollardan), eng qimmatlari esa o‘ninchi guruhga kiritildi (bu guruhda uy-joyning har bir kvadrat metri uchun 1251,69 dollargacha kuzatilgan). Har bir guruh 86,15 dollarlik narx oralig‘ini ifodalaydi”, — deyiladi manba axborotida.
Joriy yilning 2-choragida hududlar orasida eng yuqori o‘rtacha narx Toshkent shahrida qayd etilib, 1 kvadrat metr uy 1251,69 dollarga (14,6 million so‘m) baholangan. Shu bois, poytaxtdagi uylar narxi segmentatsiyasi bo‘yicha eng yuqori 10-guruhga kiritildi.
Samarqand shahri (753,03 dollar) narx segmentatsiya bo‘yicha 6-guruhdan o‘rin oldi.
O‘rtacha narx pastroq bo‘lgan Namangan, Jizzax, Surxondaryo, Buxoro, Farg‘ona, Qashqadaryo, Sirdaryo va Xorazm viloyatlari 2-guruhdan joy oldi.
Respublika bo‘yicha eng minimal narx Qoraqalpog‘iston Respublikasida kuzatildi.
Izoh (0)