Марказий банк номидан кредит таклиф этиб, одамлар картасидан пул ечиб олаётган фирибгарлар яна фаоллашгани айтилмоқда

Фирибгарлар энди Марказий банк ходими сифатида ўзларини таништириб, фуқароларнинг ишончига киришга уринаётгани айтилмоқда. Бу ҳақда иқтисодчи Отабек Бакиров Telegram’даги каналида хабар берди.

“Марказий банк номидан Telegram’да очилган “Марказий_Банки_уз” сохта каналида фуқароларга онлайн кредитлар таклиф этиб, уларнинг банк карталарига оид маълумотларини қўлга киритиш орқали банк картасидаги пул маблағларини ўзлаштириш ҳолатлари кузатилаётгани қайд этилган. Бу каби хабар ва фойдаланувчиларга Марказий банкнинг ҳеч қандай алоқаси йўқ. Эсда тутинг: Марказий банк жисмоний шахсларга кредитлар ажратмайди ва молиявий хизматлар кўрсатиш билан шуғулланмайди”, — деб ёзади иқтисодчи.

Марказий банк мобил телефонга келган бир марталик SMS-код, мобил иловалар, веб-иловаларга кириш ҳуқуқини берувчи логин ва пароллар банк ходимлари томонидан сўралмаслиги, шу боис ҳеч кимга бундай маълумотларни бермаслик зарурлиги тўғрисида доимий огоҳлантириб келади.

Шунга қарамай, фуқаролар орасида фирибгарларнинг психологик таъсирига тушиб, алданиб қолиш ҳолатлари учрамоқда.

“Қўл телефонингизга қўнғироқ қилиб, ўзини Марказий банк, тижорат банки, тўлов ташкилоти ёки тўлов тизими операторининг номидан хавфсизлик, пластик карта, мижозларни қўллаб-қувватлаш ёки бошқа бўлим ходими деб таништириб, мобил иловангиз бузилгани, банк картангиз блок ҳолатига тушгани, картадан ноқонуний пул ечиб олишга уринишлар бўлаётгани ва шу каби турли уйдирмаларни келтирган ҳолда дарҳол чора кўрилмаса, барча маблағлардан айрилиши ҳақида айтиб, фирибгарлар томонидан ижтимоий инженерингни қўллаган ҳолда турли психологик босим ўтказишга уриниш ҳолатлари шулар жумласидандир. Марказий банк турли фирибгарлик йўли билан банк карталаридаги пул маблағлари ечилишига йўл қўймаслик мақсадида фуқароларимизни огоҳлантиради”, — дея баёнот бериб келади ташкилот.

Банк карталари эгаларига телефонга келган банк карталари билан боғлиқ бир марталик юборилган SMS-кодни, тижорат банклари, тўлов тизими операторлари ва тўлов ташкилотларининг мобил иловаларига кириш ҳуқуқини берувчи логин ва паролларни ҳеч кимга айтмаслик тавсия этилади.