Buyuk Britaniyada an’anaviy televideniye auditoriyasi o‘tgan yil davomida keskin kamaydi. Agar 2021-yilda aholining 83 foizi kamida haftasiga bir marta teledasturlarni tomosha qilgan bo‘lsa, 2022-yilda bunday aholi 79 foizni tashkil etdi.
Shuningdek, inglizlarning televizor qarshisida o‘tkazadigan vaqti 12 foizga kamaydi. Bunday ma’lumotlar Britaniya telekommunikatsiya bozori regulyatori hisobotida keltirilgan.
Qayd etilishicha, mamlakat ommaviy televideniyesi tarixida birinchi marta keksalar teledasturlarni kamroq ko‘ra boshlagan. Ular tobora ko‘proq strim servislariga murojaat qilmoqdalar.
“Jamoat televideniyesi dasturlarini tomosha qilish katta yoshdagi auditoriya orasida ancha kamaymoqda. Seriallar va yangiliklar dasturlari endi avvalgidek jozibali kuchga ega emas”, — dedi tadqiqotchilardan biri.
Shu bilan birga, uning so‘zlariga ko‘ra, jamoat teleradiokompaniyalari muhim madaniy va sport voqealarini yoritish orqali auditoriyani yig‘ish jihatdan hamon tengsizdir. Shu tariqa, JCH-2022 chorak finali doirasidagi Angliya va Fransiya terma jamoalari o‘rtasidagi o‘yinni 16,1 million britaniyalik tomosha qilgan. Qirolicha Yelizaveta II ning dafn marosimini televizor orqali 13,2 million kishi tomosha qilgan.
Izoh (0)