Буюк Британияда анъанавий телевидение аудиторияси ўтган йил давомида кескин камайди. Агар 2021 йилда аҳолининг 83 фоизи камида ҳафтасига бир марта теледастурларни томоша қилган бўлса, 2022 йилда бундай аҳоли 79 фоизни ташкил этди.
Шунингдек, инглизларнинг телевизор қаршисида ўтказадиган вақти 12 фоизга камайди. Бундай маълумотлар Британия телекоммуникация бозори регулятори ҳисоботида келтирилган.
Қайд этилишича, мамлакат оммавий телевидениеси тарихида биринчи марта кексалар теледастурларни камроқ кўра бошлаган. Улар тобора кўпроқ стрим сервисларига мурожаат қилмоқдалар.
“Жамоат телевидениеси дастурларини томоша қилиш катта ёшдаги аудитория орасида анча камаймоқда. Сериаллар ва янгиликлар дастурлари энди аввалгидек жозибали кучга эга эмас”, — деди тадқиқотчилардан бири.
Шу билан бирга, унинг сўзларига кўра, жамоат телерадиокомпаниялари муҳим маданий ва спорт воқеаларини ёритиш орқали аудиторияни йиғиш жиҳатдан ҳамон тенгсиздир. Шу тариқа, ЖЧ-2022 чорак финали доирасидаги Англия ва Франция терма жамоалари ўртасидаги ўйинни 16,1 миллион британиялик томоша қилган. Қиролича Елизавета II нинг дафн маросимини телевизор орқали 13,2 миллион киши томоша қилган.
Изоҳ (0)