AQSHda 63 yoshli Den Xo ismli erkak suzayotgan paytida tasodifan qirg‘oqdan to‘rt kilometr uzoqlikda joylashgan Atlantika okeani oqimiga tushib qoldi va singan qarmoq tufayli omon qoldi. Bu haqda Nyu-Yorkning Saffolk okrugi politsiya boshqarmasi ijtimoiy tarmoqlarida xabar berildi, deb yozmoqda “Pravila jizni” nashri.
Long-Aylenddagi Kopiag qishlog‘ida yashovchi fuqaro ertalab soat beshda suzishga qaror qilgan. U tasodifan Atlantika okeani oqimiga tushib qolgan. Den Xo ochiq suvda taxminan besh soat suzgan.
Amerikalik fuqaro okean yuzasidan singan qarmoqni topib olgan va unga ko‘ylagini bog‘lab, silkitgan. Shundan keyin Xoni motorli qayiqda o‘tayotgan ikki baliqchi payqab qolgan. Ularning so‘zlariga ko‘ra, yaqin atrofda boshqa qayiq va kemalar bo‘lmagan.
Ular Den Xoni qutqarib, ratsiya orqali dengiz politsiyasi bilan bog‘langan.
“U ko‘karib qolgandi, tanasi kulrang edi, qaltirardi, isitmasi bor edi. Biz uni sochiq bilan o‘rab qo‘ydik”, — deydi baliqchilardan biri.
Huquq-tartibot xodimlari Xoning oldiga kelganlarida, u o‘rnidan turolmagan. Politsiya qayig‘ida unga birinchi yordam ko‘rsatilgan. Keyin AQSH qirg‘oq qo‘riqlash stansiyasiga yetkazilgan va u yerdan tez yordam mashinasida kasalxonaga olib ketilgan.
Izoh (0)