АҚШда 63 ёшли Ден Хо исмли эркак сузаётган пайтида тасодифан қирғоқдан тўрт километр узоқликда жойлашган Атлантика океани оқимига тушиб қолди ва синган қармоқ туфайли омон қолди. Бу ҳақда Нью-Йоркнинг Саффолк округи полиция бошқармаси ижтимоий тармоқларида хабар берилди, деб ёзмоқда “Правила жизни” нашри.
Лонг-Айленддаги Копиаг қишлоғида яшовчи фуқаро эрталаб соат бешда сузишга қарор қилган. У тасодифан Атлантика океани оқимига тушиб қолган. Ден Хо очиқ сувда тахминан беш соат сузган.
Америкалик фуқаро океан юзасидан синган қармоқни топиб олган ва унга кўйлагини боғлаб, силкитган. Шундан кейин Хони моторли қайиқда ўтаётган икки балиқчи пайқаб қолган. Уларнинг сўзларига кўра, яқин атрофда бошқа қайиқ ва кемалар бўлмаган.
Улар Ден Хони қутқариб, рация орқали денгиз полицияси билан боғланган.
“У кўкариб қолганди, танаси кулранг эди, қалтирарди, иситмаси бор эди. Биз уни сочиқ билан ўраб қўйдик”, — дейди балиқчилардан бири.
Ҳуқуқ-тартибот ходимлари Хонинг олдига келганларида, у ўрнидан туролмаган. Полиция қайиғида унга биринчи ёрдам кўрсатилган. Кейин АҚШ қирғоқ қўриқлаш станциясига етказилган ва у ердан тез ёрдам машинасида касалхонага олиб кетилган.
Изоҳ (0)