Rossiyaning Belgorod viloyatida yashovchi meyn-kun zotiga mansub mushuk xorijning yirik nashrlari e’tiborini tortdi. “Kefir laqabli dunyodagi eng yirik mushuk” haqida The Sun, The Mirror va New York Post nashrlari maqola e’lon qildi.
Kefir o‘tgan yilning boshida Reddit yulduziga aylangan edi. O‘shanda ijtimoiy tarmoqda mushuk va uning egasi Yuliya Mininaning suratlari tarqalgandi. Suratlarda mushukning juda katta ekanligi ijtimoiy tarmoqlar foydalanuvchilarining e’tiborini tortgan edi.
Mininlar oilasi Kefirni 2020-yilda boqib olgan. O‘shanda mushukning avvalgi egasi uning ota-onasi nihoyatda katta bo‘lganini aytgan, biroq Yuliya jonivor shu darajada katta bo‘lib ketishini xayoliga ham keltirmagan edi.
Hozir Kefir uch yoshda, uning og‘irligi 12,5 kilogrammni tashkil etadi. Mushuk orqa oyoqlariga turib olganida uning bo‘yi Yuliyaning to‘rt yoshli qiziga yetadi. Meyn-kunlar to‘rt yoshgacha o‘sishini inobatga olsak, keyingi yilda mushuk bundan ham kattaroq bo‘lishi mumkin.
Kefirning tashqi ko‘rinishi jiddiy va qo‘rqinchli tuyulsa-da, u aslida juda yoqimtoy. Mushukning o‘z stuli bor, hamma ovqatlanayotgan paytda jonivor ham o‘z joyini egallaydi.
Izoh (0)