O‘zbekistonda yanvar–iyun oylarida aholi bandligini taʼminlash, kambag‘allikni qisqartirish bo‘yicha bir qancha ishlar bajarildi. Bu haqda Kambag‘allikni qisqartirish va bandlik vazirligi maʼlum qildi.
Foto: “Daryo” / Madina Nurman
Qayd etilishicha, mamlakatda kambag‘allikni qisqartirish va bandlik organlari orqali 190,5 ming fuqarolar doimiy ish o‘rinlariga ishga joylashtirilgan. Shu bilan birga, 74,7 ming fuqarolar kasb-hunarga o‘qitishga, 67,6 ming fuqarolar jamoat ishlariga jalb etilgan. Yana 30,6 ming fuqarolar bandligini taʼminlash uchun 137,5 milliard so‘m subsidiya mablag‘lari ajratildi.
“Oilaviy tadbirkorlik dasturi doirasida 13 trillion so‘m kredit ajratish belgilanib, hokim yordamchilari tavsiyasi asosida yanvar-iyun oylarida 248,1 ming fuqaroga 5,2 trillion so‘m (40 foiz) kredit mablag‘lari ajratildi”, — deyiladi vazirlik xabarida.
Hisobot davrida aholi bandligini taʼminlash maqsadida 417,6 ming aholiga 96,7 ming gektar yer maydoni ajratish belgilanib, 80,7 ming (83,5 foiz) gektar ekin yerlari elektron savdo platformasi orqali 223,9 ming (53,6 foiz) aholiga ijara asosida ajratildi. Bundan tashqari, hokim yordamchilari ko‘magida 2,076 trillion so‘mlik 9 ming 834 ta loyihalarni amalga oshirish orqali 36 mingta yangi ish o‘rinlari tashkil etildi.
O‘zbekistonda doimiy yashovchi aholi (2023-yil 1-iyul holatiga) soni 36 million 372 ming kishini tashkil etmoqda. Mamlakatda kambag‘allik darajasi 14,1 foiz. Bu 5 million 95 ming nafardan ortiq odamning oylik daromadlari minimal isteʼmol xarajatlari (568 ming so‘m) darajasida degani.
Respublikada kambag‘allik darajasi eng yuqori hudud — Qoraqalpog‘iston bo‘lib, u yerdagi qariyb 19,7 foiz aholining daromadlari minimal isteʼmol xarajatlari qiymatidan kam. Sirdaryo va Xorazm aholisi orasida ham shunga yaqin ko‘rsatkich — 19,5 va 19,1 foiz kambag‘allik mavjud. Hozirda kambag‘allik darajasi eng past hudud — Toshkent shahri (8,5 foiz) hisoblanadi.
Avvalroq Kambag‘allikni qisqartirish va bandlik vazirligi shu yilning yakunigacha respublikada kambag‘allik darajasi 14,1 foizdan 12 foizga tushirilib, 1 million aholini kambag‘allikdan chiqarish belgilanganini maʼlum qilgandi.
Izoh (0)