Kolumbiya prezidenti Gustavo Petroning o‘g‘li Nikolas Petro 2022-yilgi saylov kampaniyasi davomida giyohvand moddalar sotuvchilaridan to‘plagani aytilayotgan mablag‘lar bo‘yicha tergov doirasida qo‘lga olindi, deb yozadi The Guardian nashri.
Korrupsiyaga qarshi kurashchi sifatida yaxshi tanilgan prezident Gustavo Petro tergovga aralashmasligini ta’kidladi.
“Avvalo, inson va ota sifatida o‘g‘limning qamoqqa tushishini ko‘rish men uchun og‘ir. Respublika prezidenti sifatida esa men Bosh prokuratura qonunga muvofiq harakat qilishi uchun barcha kafolatlarga ega bo‘lishini aytib o‘tmoqchiman”, — deb yozdi u Twitter’dagi sahifasida.
Nikolas Petroning hibsga olinishi konservatorlar tomonidan tanqidga uchragan hukumat uchun katta zarba bo‘ldi.
Tergov Nikolas Petroning sobiq rafiqasi Daisuris del Karmen Vaskesning bayonotlariga asosan boshlandi.
Intervyuda Vaskesning aytishicha, u eri Vashingtonda giyohvand moddalar savdosi uchun sudlangan va siyosiy faoliyatini qayta boshlash uchun Petroning kampaniyasidan yordam so‘ragan siyosatchidan 600 million pesodan ko‘proq xayriya olgan uchrashuvlarda ishtirok etgan.
Uning so‘zlariga ko‘ra, prezident Petro o‘g‘lining harakatlaridan bexabar bo‘lgan. Nikolas Petro olgan mablag‘lar qirg‘oq bo‘yida joylashgan Barrankillya shahridagi uyda — seyfda saqlangan.
Nikolas Petro sobiq xotinining da’volarini rad etib, ularni asossiz deb atadi.
Izoh (0)