Колумбия президенти Густаво Петронинг ўғли Николас Петро 2022 йилги сайлов кампанияси давомида гиёҳванд моддалар сотувчиларидан тўплагани айтилаётган маблағлар бўйича тергов доирасида қўлга олинди, деб ёзади The Guardian нашри.
Коррупцияга қарши курашчи сифатида яхши танилган президент Густаво Петро терговга аралашмаслигини таъкидлади.
“Аввало, инсон ва ота сифатида ўғлимнинг қамоққа тушишини кўриш мен учун оғир. Республика президенти сифатида эса мен Бош прокуратура қонунга мувофиқ ҳаракат қилиши учун барча кафолатларга эга бўлишини айтиб ўтмоқчиман”, — деб ёзди у Twitter’даги саҳифасида.
Николас Петронинг ҳибсга олиниши консерваторлар томонидан танқидга учраган ҳукумат учун катта зарба бўлди.
Тергов Николас Петронинг собиқ рафиқаси Даисурис дел Кармен Васкеснинг баёнотларига асосан бошланди.
Интервьюда Васкеснинг айтишича, у эри Вашингтонда гиёҳванд моддалар савдоси учун судланган ва сиёсий фаолиятини қайта бошлаш учун Петронинг кампаниясидан ёрдам сўраган сиёсатчидан 600 миллион песодан кўпроқ хайрия олган учрашувларда иштирок этган.
Унинг сўзларига кўра, президент Петро ўғлининг ҳаракатларидан бехабар бўлган. Николас Петро олган маблағлар қирғоқ бўйида жойлашган Барранкилля шаҳридаги уйда — сейфда сақланган.
Николас Петро собиқ хотинининг даъволарини рад этиб, уларни асоссиз деб атади.
Изоҳ (0)