Rossiya prezidenti Vladimir Putin turkiyalik hamkasbi Rajab Toyyib Erdo‘g‘on bilan 2-avgust kuni telefon orqali muloqot qildi. Bu haqda Sabah xabar berdi.
Prezidentlar don bitimi va Putinning Turkiyaga tashrifi bo‘yicha kelishib olgan. Kreml avvalroq bunday sayohat rejalari borligini aytgan, biroq ehtimoliy sanalar ochiqlanmagan.
Putin va Erdo‘g‘on nima haqida gaplashdi?
Rossiya prezidenti turkiyalik hamkasbi bilan Turkiyaga tashrifi borasida kelishib olgan. Biroq Putinning mamlakatga qachon kelishi ochiqlanmagan. Avvalroq Erdo‘g‘on Rossiya prezidentini avgust oyida kutayotganini aytgandi.
Putinning o‘zi 29-iyul kuni bo‘lib o‘tgan matbuot anjumanida Erdo‘g‘on bilan uchrashish imkoniyatini izohlar ekan: “Yoki u bizga keladi, yoki men uning oldiga boraman, ko‘ramiz”, degandi.
Prezidentlar boshqa masalalar qatori don bitimini ham muhokama qilgan. Erdo‘g‘on Turkiya kelishuvni yangilash uchun diplomatik sa’y-harakatlarni amalga oshirishiga va’da bergan. U don bitimining to‘xtashi “hech kimga foyda keltirmasligi”, bundan oziq-ovqat taʼminotiga muhtoj davlatlar eng ko‘p zarar ko‘rishini aytgan.
Erdo‘g‘on Rossiya tomoniga o‘rmon yong‘inlari bilan kurashish uchun Turkiyaga ikkita “Be-200ChS” amfibiya samolyoti jo‘natgani uchun minnatdorlik bildirib, rossiyalik sayyohlarning Turkiyaga qiziqishi ortib borayotganini qayd etgan
Ikki davlat rahbarining telefon orqali muloqoti haqida avvalroq Rossiya prezidenti matbuot kotibi Dmitriy Peskov maʼlum qilgandi.
Rossiya va Turkiya rahbarlari oxirgi marta yoz boshida telefon orqali gaplashgan:
7-iyun kuni ular ikki tomonlama munosabatlar va Ukrainadagi vaziyatni muhokama qilgan, 24-iyun kuni esa Turkiya tomonining iltimosiga binoan Putin “Vagner” bilan bog‘liq vaziyatga oydinlik kiritgan. Rossiyaning don shartnomasini uzaytirmaslik haqidagi qaroridan keyin prezidentlar muloqot qilmadi, kelishuv 17-iyul kuni bekor qilingandi.
Izoh (0)