Shavkat Mirziyoyev raisligida kambag‘allikni qisqartirish, aholi bandligini taʼminlash va tadbirkorlikni qo‘llab-quvvatlash orqali soliq bazasini kengaytirish bo‘yicha videoselektor yig‘ilishi bo‘lib o‘tmoqda. Bu haqda Prezident matbuot xizmati xabar berdi.
Yig‘ilish bejizga Toshkent viloyatida o‘tkazilmayotgani, hududdagi iqtisodiy natijalar Toshkent viloyatining haqiqiy salohiyatiga mos kelmasligi taʼkidlandi. “Mahallabay” ishlash tizimini yo‘lga qo‘yib, alohida dasturlar ishlab chiqilgani hisobiga mamlakatda kambag‘allik darajasi 17 foizdan 14 foizga tushdi.
Bu bir yarim yilning o‘zida 3 million aholi doimiy daromadga ega bo‘ldi, 1,5 million aholi esa kambag‘allikdan qutildi, degani. Umuman, respublikadagi 347 ta mahalla kambag‘allikdan xoli, yana 1,5 mingga yaqin mahalla esa ishsizlik bo‘lmagan hududga aylandi.
“Vazirlar va hokimlar bir narsani aniq tushunib olishi zarur. Kambag‘allikni qisqartirish bitta vazirlik yoki agentlikning ishi emas, aholiga faqatgina moddiy yordam yoki kredit berishning o‘zi yetarli bo‘lmaydi. Buning uchun, eng avvalo, hududlarda infratuzilma bo‘lishi, bu orqali ishlab chiqarish va xizmatlar rivojlanishi kerak”, — dedi prezident.
Izoh (0)