Gretsiya Milliy mudofaa vazirligi yanglishib, maxfiy harbiy xaritalar suratlarini namoyish etdi, deb xabar berdi Antitheto axborot portali.
Nea Anxialosdagi 111-sonli o‘q-dori omborlarida sodir bo‘lgan yong‘inlardan so‘ng, mudofaa vaziri o‘rinbosari Nikos Xardalias harbiy obyektlarda yong‘in xavfsizligi talablariga rioya etilishini navbatdan tashqari tekshirishni boshladi.
“Milliy mudofaa vazirligi vazir o‘rinbosari obyektlardan birini tekshirish vaqtida ko‘rib chiqayotgan maxfiy harbiy xaritalar suratlarini tasodifan e’lon qilib yubordi”, — deyiladi xabarda.
“Ushbu voqeadan so‘ng Milliy Mudofaa vazirligi bo‘linmalarda yong‘in xavfsizligi tekshiruvlari to‘xtatilganini e’lon qildi. Milliy mudofaa vaziri o‘rinbosari Xardaliasning Petsali, Araksos va Andravidadagi aerodromlariga rejalashtirilgan tashriflari keyinga qoldirildi”, — deb yozadi portal.
Suratlar Mudofaa vazirligining press-relizi bilan birga yuborilgan. Qo‘pol xatoga yo‘l qo‘yilgani ma’lum bo‘lgach, ko‘p o‘tmay, xiralashtirilgan xaritalar surati bilan yangi press-reliz yuborildi.
Portal buni o‘q-dorilar omboridagi yong‘indan keyin harbiy bo‘limning “yangi fiaskosi” deb atamoqda.
Izoh (0)