Toshkentning ikki tumanida favqulodda holat sabab “svet” o‘chdi

Toshkent shahrining ikki tumani — Chilonzor va Uchtepa tumanlarida favqulodda avariya holati sababli elektr energiyasi ta’minoti vaqtincha to‘xtatildi. Bu haqda “Hududiy elektr tarmoqlari” AJ Toshkent shahar filiali matbuot xizmati xabar berdi. 

Unga ko‘ra, Chilonzor hamda Uchtepa tuman hududlaridagi ayrim aholi iste’molchilarini elektr energiyasi bilan ta’minlovchi PS “Ozodlik”, PS “Rayhon”dan chiquvchi L-Rayhon-1 110 kVli  yuqori kuchlanishli elektr uzatish havo tarmog‘ida yuklamaning ortib ketishi natijasida favqulodda avariya holatida elektr ta’minotida uzilish sodir bo‘ldi.

Ayni vaqtda, “Hududiy elektr tarmoqlari” AJ Toshkent shahar filialining tezkor chiqish brigadalari zarur elektr qurilmalar hamda maxsus avtotransport vositalari bilan mazkur nosozlikni bartaraf etishga jalb etilgan. Tez orada mazkur nosozlik to‘liq bartaraf etilib, tarmoq orqali elektr energiyasi yetkazib berilishi to‘liq tiklanadi. 

“Yuzaga kelgan favqulodda avariyali uzilish vaqti keltirilgan noqulayliklar uchun  iste’molchilardan uzr so‘raymiz”, deyiladi xabarda.