Тошкент вилояти ИИББ Тезкор қидирув хизмати ва унинг қуйи тизими ҳамда соҳавий хизмат ходимлари томонидан 2023 йилнинг 6 ойи давомида жиноят содир этгани ва бошқа ҳолатлар юзасидан 344 нафар қидирувда бўлган шахс ушланиб, қонун устуворлиги ва жазо муқаррарлиги таъминланди, деб хабар бермоқда вилоят ИИББ матбуот хизмати.
Хусусан, қасддан одам ўлдириш жиноятини содир этиб, 2002 йилдан буён қидирувда бўлган 48 ёшли Х.Ш. (Ангрен шаҳрида яшаган) Қозоғистон ҳуқуқ-тартибот органлари ходимлари билан ҳамкорликда ушланиб, Ўзбекистонга экстрадиция қилинган.
Шу каби, қасддан одам ўлдириш, босқинчилик содир этиб, 2015 йилдан буён қидирувда бўлган 40 ёшли Р.П. (Ўрта Чирчиқ тумани ИИБ томонидан қидирувга берилган) Россия ҳуқуқ-тартибот органлари ходимлари билан ҳамкорликда ушланиб, Ўзбекистонга экстрадиция қилинган.
Фирибгарлик содир этиб, 2021 йилдан буён қидирувда бўлган 29 ёшли С.Н. (Оққўрғон туманида яшаган) ҳам Россия ҳуқуқ-тартибот органлари ходимлари билан ҳамкорликда ушланиб, Ўзбекистонга экстрадиция қилинган.
Таҳлилларга кўра, қидирувдаги шахсларнинг асосий қисми фирибгарлик жиноятини содир этган шахслар ҳисобланади.
Бундан ташқари, ўтган 6 ойда турли сабабларга кўра бедарак йўқолган 23 нафар шахс вилоят ИИО ходимлари томонидан аниқланиб, яшаш манзилларига қайтарилиши таъминланган.
Изоҳ (0)