O‘zbekiston xalq artisti Malika Ahmedovaning uyidan 680 ming dollarlik taqinchoqlar o‘g‘irlangani bo‘yicha 4 kishi sud qilinmoqda

O‘zbekiston xalq artisti Malika Ahmedova yashash uyidan 600 ming dollarlik qimmatbaho taqinchoqlar o‘g‘irlab ketilgani, gumonlanuvchilar topilsa-da, brilliant va tillalar qaytarilmagani haqida gapirgan hamda prezident Shavkat Mirziyoyevga yordam so‘rab murojaat yo‘llagandi.

Murojaatga asosan,11-aprel kuni Malika Ahmedova Mirzo Ulug‘bek tumani prokurori Aliakbar Pulatovning qabuliga taklif qilingan va uning tergov bilan bog‘liq eʼtiroz va vajlari tinglangan edi. 

“Gazeta.uz”ning Oliy sud axborot xizmati Aziz Abidovga tayanib yozishicha, ushbu ish doirasida 4 nafar fuqaro ayblanib, sudlanmoqda.

Taʼkidlanishicha, Jinoyat ishlari bo‘yicha Mirzo Ulug‘bek tumani sudining ish yurituviga 7-iyul kuni S.R. va F.I.ni Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik) bilan hamda M.N. va O.X.ni Jinoyat kodeksining 171-moddasi 3-qismi “a” bandi (jinoiy yo‘l bilan topilgan mulkni olish yoki o‘tkazish) bilan ayblash haqida jinoyat ishi kelib tushgan. Mazkur ishni sud majlisida ko‘rish 21-iyulga tayinlangan.

Sudlanuvchilar S.R., F.I., M.N. va O.X.ga nisbatan qamoq ehtiyot chorasi qo‘llangan.

Ish hujjatlariga ko‘ra, S.R. tanishi F.I. va tergov davrida shaxsini aniqlashning imkoni bo‘lmagan nomaʼlum shaxslar bilan birga o‘zganing mulkini yashirin ravishda qo‘lga kiritib, jinoiy reja tuzgan.

Ular 2022-yil 28-dekabr kuni mast holatda Mirzo Ulug‘bek tumanida yashovchi fuqaro Hadicha Ahmedova (raqqosa Malika Ahmedovaning qizi, ular bitta hovlida istiqomat qiladi)ga tegishli xonadonga devor qismidan oshib kirgan.

“Ular xonadonda saqlanib kelinayotgan jami qiymati 681 895 dollarlik (7,8 milliard so‘m atrofida) buyumlarni o‘g‘irlab, jinoyat joyidan yashiringan. Qo‘lga kiritgan qimmatbaho taqinchoqlarni avvaldan tanishi bo‘lgan fuqaro M.N.ga barcha narsalar o‘ziga tegishliligini aytib, 250 ming dollar evaziga sotib yuborgan. Keyinchalik pul mablag‘laridan 1000 dollarini tanishi F.I.ga qarz tariqasida bergan. Qolgan barcha pul mablag‘larini shaxsiy ehtiyojlariga sarflab, X.Ahmedovaning qonun bilan qo‘riqlanadigan manfaatlariga juda ko‘p miqdorda zarar yetkazgan”, — deyiladi Oliy sud axborotida.

Hozirda mazkur jinoyat ishi sud tergovi bosqichida bo‘lib, 1-avgustga qadar tanaffus eʼlon qilingan.