Марҳум рэпер Тупак Шакурнинг олтин узуги Нью-Йоркда бўлиб ўтган аукционда рекорд даражадаги қийматда — 1,02 миллион долларга сотилди. Бу 300 минг долларга баҳоланган заргарлик буюмининг асл нархидан уч баравар қимматроқ, деб хабар бермоқда “Правила жизни” нашри.
.jpg)
Fox нашри тақдим этган маълумотларга кўра, бу узук аукционда сотилган хип-хоп билан боғлиқ энг қиммат буюм бўлди. Харидорнинг исми ошкор этилмаган.
Тупак узукнинг дизайнини ўзи ишлаб чиққан. Рэпер узукни 1996 йил 4 сентябрда МTV Video Music Awards маросимида сўнгги марта омма олдида чиқиш қилган пайтда таққан эди.
Узук ўрта асрлардаги Европа қироллари тожлари дизайнидан илҳомланиб, тож шаклида қилинган. У кабочон услубида кесилган думалоқ олмос ва ёқутлар билан безатилган.
Заргарлик буюмининг ташқи томонига Pаc&Dаdа 1996 ёзуви ўйиб ёзилган бўлиб, у рэпернинг актриса ва дизайнер Кидада Жонс билан унаштирилгани хотирасига бағишланган.
Тупак Шакур 25 ёшида, 1996 йил 13 сентябрда Лас-Вегасда машинасида кетаётганида унга ўқ узилганидан бир ҳафта ўтиб вафот этган.
Унинг қотили ҳалигача топилмаган, бироқ АҚШнинг Невада штати полицияси тергов ишини давом эттирмоқда. Ноябрь ойи ўрталарида полиция ходимлари Тупак ўлдирилган жойдан 30 км узоқликда жойлашган Лас-Вегас чеккасидаги Хендерсон шаҳридаги уйни тинтув қилган.
Изоҳ (0)