Meksikada bir qancha egasiz itlar jaziramadan qutulishning yangi yo‘lini topdi – ular elektr anjomlari sotiladigan do‘konga kirib, odamlardan hadiksiramagan holda salqin savdo maydonchasi o‘rtasida yotib oldi, deb xabar bermoqda AdMe nashri.
Salqinlanishning bunday usuli ajablanarli emas — ko‘pchiligimiz issiq ish kunining qoq yarmida siesta (issiq mamlakatlarda kunning ikkinchi yarmida odat tusiga kirgan uyqu vaqti) o‘tkazishga qarshi emasmiz. Yana bir narsa ajablanarli: do‘kon xodimlari to‘rt oyoqlilarni haydab solmagan, do‘kon tarmoqlari egasi esa boshpanasiz hayvonlar yordamga muhtojligini qayd etgan.
Meksikaning “Elektra” savdo tarmog‘i esa kutilmaganda ijobiy PR bo‘ldi. Durango shtatidagi tarmoq do‘konlaridan birida tashrif buyuruvchilar ko‘rgazmadagi konditsionerlar ostida, blender va kofe mashinalari o‘rnatilgan rastalar orasida yotgan itlarni suratga oldi. Va bu suratlar tezda ijtimoiy tarmoqlar bo‘ylab tarqaldi.
Ehtimol, savdo maydonchasining o‘rtasida joylashib olgan katta itlar do‘konga tashrif buyuruvchilarga zarar berishi mumkin. Ammo jonzotlarga nisbatan bunday insonparvarlik munosabati tarmoq foydalanuvchilarini hayratga soldi va olqishiga sazovor bo‘ldi.
Tarmoq egasi — taniqli meksikalik milliarder Rikardo Salinas Pliego vaqtinchalik qo‘nim topgan itlarni bezovta qilmaslikka va ularni zaldan haydab chiqarmaslikka chaqirdi. Uning ta’kidlashicha, egasiz hayvonlarni qo‘llab-quvvatlash uning kompaniyasi siyosatidagi nuqtalardan biri: “Bu mening barcha kompaniyalarimda it va mushuklarga yaxshi munosabatda bo‘lish bo‘yicha buyrug‘im. So‘zdan ko‘ra harakat muhimroq”, — deb yozgan kompaniya rahbari.
Meksika bu yozda jazirama to‘lqinini boshdan kechirmoqda, ba’zi joylarda harorat 40 °C dan oshadi. Shu bois, bunday insonparvarlik ishorasi ko‘pchilik tarmoq foydalanuvchilari tomonidan ma’qullandi.
“Bizning zamonamizda olqishga arziydigan ezgu ish”, “Men yana insoniyatga ishondim”; “Bunday aksiyadan so‘ng men ushbu do‘kondan mototsikl sotib olishga tayyorman”, deb yozadi foydalanuvchilar.
Ozgina mehribonlik va insoniy munosabat haqiqatan ham dunyoni o‘zgartirishi mumkin.
Izoh (0)