“Tolibon” delegatsiyasi Qatar poytaxti Dohada AQSH vakillari bilan uchrashib, qaytadan muzokara o‘tkazadi. “Tolibon” Tashqi ishlar vazirligi matbuot kotibi Abdulqahhor Balxiyning so‘zlariga ko‘ra, besh kun ichida vazirlik rahbari Amirxon Mutaqqiy boshchiligidagi delegatsiya Dohaga boradi.
Ushbu muzokaralarda “Tolibon” quyidagi masalalarni ko‘tarmoqchi:
- Toliblar hukumatiga AQSHdan kiritilgan sanksiyalarni olib tashlash;
- “Tolibon” hukumatini Birlashgan Millatlar Tashkiloti “qora ro‘yxatidan” chiqarish;
- Afg‘onistonning xorijdagi aktivlarini blokdan chiqarish;
- Amerika dronlarining Afg‘oniston havo hududini buzib kirishiga chek qo‘yish.
AQSH Davlat departamentining aniqlik kiritishicha, “Tolibon” bilan muzokaralarda Vashington nomidan Afg‘oniston bo‘yicha maxsus vakil Tom Uest hamda Afg‘onistondagi xotin-qizlar va inson huquqlari bo‘yicha maxsus vakil Rina Amiri qatnashadi.
AQSH vakillaridan tashqari “Tolibon” Qatar rasmiylari bilan ham ikki tomonlama uchrashuvlar o‘tkazadi.
Avvalroq Amirxon Muttaqiy “Tolibon” harakatiga nisbatan joriy qilingan sanksiylar bekor qilinsa, AQSH bilan hamkorlik qilishga tayyorligini bildirgandi. U Afg‘oniston va dunyo davlatlari o‘rtasida yaqinlashuvni boshlash imkoniyati paydo bo‘lganini aytgan.
Eslatib o‘tamiz, Afg‘onistondagi iqtisodiy va gumanitar inqiroz 2021-yil 15-avgustda “Tolibon” Kobulni egallab olganidan keyin Vashington va boshqa xalqaro donorlar tomonidan xorijdagi afg‘on aktivlari muzlatib qo‘yilganidan keyin yanada og‘irlashgan.
Izoh (0)