“Толибон” делегацияси Қатар пойтахти Доҳада АҚШ вакиллари билан учрашиб, қайтадан музокара ўтказади. “Толибон” Ташқи ишлар вазирлиги матбуот котиби Абдулқаҳҳор Балхийнинг сўзларига кўра, беш кун ичида вазирлик раҳбари Амирхон Мутаққий бошчилигидаги делегация Доҳага боради.
Ушбу музокараларда “Толибон” қуйидаги масалаларни кўтармоқчи:
- Толиблар ҳукуматига АҚШдан киритилган санкцияларни олиб ташлаш;
- “Толибон” ҳукуматини Бирлашган Миллатлар Ташкилоти “қора рўйхатидан” чиқариш;
- Афғонистоннинг хориждаги активларини блокдан чиқариш;
- Америка дронларининг Афғонистон ҳаво ҳудудини бузиб киришига чек қўйиш.
АҚШ Давлат департаментининг аниқлик киритишича, “Толибон” билан музокараларда Вашингтон номидан Афғонистон бўйича махсус вакил Том Уэст ҳамда Афғонистондаги хотин-қизлар ва инсон ҳуқуқлари бўйича махсус вакил Рина Amiri қатнашади.
АҚШ вакилларидан ташқари “Толибон” Қатар расмийлари билан ҳам икки томонлама учрашувлар ўтказади.
Аввалроқ Амирхон Муттақий “Толибон” ҳаракатига нисбатан жорий қилинган санксийлар бекор қилинса, АҚШ билан ҳамкорлик қилишга тайёрлигини билдирганди. У Афғонистон ва дунё давлатлари ўртасида яқинлашувни бошлаш имконияти пайдо бўлганини айтган.
Эслатиб ўтамиз, Афғонистондаги иқтисодий ва гуманитар инқироз 2021 йил 15 августда “Толибон” Кобулни эгаллаб олганидан кейин Вашингтон ва бошқа халқаро донорлар томонидан хориждаги афғон активлари музлатиб қўйилганидан кейин янада оғирлашган.
Изоҳ (0)