Afg‘oniston muvaqqat hukumatining tashqi ishlar vaziri Amirxon Muttaqiy “Tolibon” harakatiga nisbatan joriy qilingan sanksiylar bekor qilinsa, AQSH bilan hamkorlik qilishga tayyorligini bildirdi. Bu haqda Ariana News xabar berdi.
Muttaqiyning so‘zlariga ko‘ra, Afg‘onistonda nafaqat urush tugadi, balki mamlakat mustaqil, qudratli, birlashgan, markaziy va mas’uliyatli hukumat tomonidan boshqarilmoqda. U Afg‘oniston va dunyo davlatlari o‘rtasidagi yaqinlashuvni boshlash imkoniyati paydo bo‘lganini bildirdi.
“Afg‘oniston xalqaro hamjamiyatning mas’uliyatli va mustaqil a’zosi sifatida ko‘tarilishi va global tinchlik, xavfsizlikni ta’minlashda o‘z mas’uliyatini ado etishga tayyor. Xalqaro hamjamiyat, o‘z navbatida, Afg‘onistonni o‘z bag‘riga qabul qilib, uning mustaqilligiga hurmat ko‘rsatib, oyoqqa turishiga yordam berishi kerak. Bizning tashqi siyosatimiz global va mintaqaviy raqobatga aralashib qolmaslik uchun muvozanatli va mustaqil yondashuvga asoslanadi. Tenglik va hurmat tamoyiliga asoslangan umumiy manfaatlar va tinch-totuv yashash imkoniyatlariga intilamiz”, — dedi u.
Muttaqiy mamlakatdagi inqirozni tan oldi va bunda AQSH va boshqa davlatlar tomonidan kiritilgan sanksiyalarni sabab qilib ko‘rsatdi.
“Davom etayotgan iqtisodiy inqirozning asosiy sababi AQSH tomonidan sanksiyalar va bank cheklovlarining joriy etilishidir. Bu bizning gumanitar inqirozni hal qilish bo‘yicha harakatlarimizga to‘sqinlik qiladi. AQSH urushdan vayron bo‘lgan davlatga qarshi sanksiyalarni qo‘llash uchun qanday ma’naviy va siyosiy asoslarga ega bo‘lishi mumkin?”, — dedi Muttaqiy.
Uning qo‘shimcha qilishicha, so‘nggi yigirma yil ichida Afg‘oniston iqtisodiyoti “to‘liq chet el yordamiga qaram bo‘lib qolgan” va hozirda nol yordam bilan “afg‘on xalqining asosiy ehtiyojlarini qondirish” zarur.
U AQSH va boshqa mamlakatlarga sanksiyalar va bosimlar kelishmovchilikni bartaraf etmasligini qayd etdi.
“Xalqaro hamjamiyat Afg‘oniston Islom Amirligi suvereniteti va hududiy yaxlitligini hurmat qilgan holda u bilan siyosiy va iqtisodiy aloqalarni o‘rnatishi zarur”, — dedi “Tolibon” rasmiysi.
U agar sanksiyalar Afg‘onistonda yana bir hukumatning muvaffaqiyasizligiga sabab bo‘lsa, bu nafaqat mamlakat, balki butun dunyo uchun og‘ir oqibatlarga olib kelishidan ogohlantirdi.
“Bunday ssenariy Afg‘oniston bilan cheklanib qolmay, balki qo‘shnilarimiz, mintaqa va dunyo uchun yangi va kutilmagan xavfsizlik, qochqinlar, iqtisodiy, sog‘liq va boshqa muammolarni keltirib chiqaradigan buyuk insoniy fojia bilan birga keladi”, — deydi u.
Izoh (0)