Toshkent aeroportida taksi va boshqa xizmatlar uchun joylar ijarasi auksionga qo‘yildi
Uzbekistan Airports boshqaruv kompaniyasi Toshkent aeroportida joy ijarasi uchun “E-auksion” saytida bir nechta lotlarni joylashtirdi.
Ular orasida umumiy ovqatlanish va chakana savdo shoxobchalari, savdo avtomatlari va taksi xizmatlari uchun joylar mavjud.
Ijara maydonlarining aksariyati hozirda rekonstruksiya qilinayotgan uchib ketish zalining chap tomonida joylashgan.
Hozirda auksion uchun o‘nta lot qo‘yilgan. Uchib ketish zali va pochta-yuk kompleksida savdo avtomatlarini joylashtirish uchun joy ijaraga beriladi.
2 kvadrat metr maydonga uchta savdo avtomati (qahva/sneklar/ichimliklar) joylashtiriladi. Lotning boshlang‘ich summasi yiliga 28,8 mln so‘m.
Umumiy ovqatlanish punktini tashkil qilish uchun aeroport uchta joyni taklif etadi — ikkitasi jo‘nash terminalining “steril” zonasida va bittasi estakada ostidagi maydon — hozirgi JUM kafesi.
Kafe-bar uchun uchib ketish zalida 25 kvadrat metr va 80 kvadrat metr maydonlar, to‘liq oshxona tashkil qilish imkoniyatisiz, ijaraga beriladi.
O‘rnatilgan talablarga muvofiq, ijarachi kompaniya umumiy ovqatlanish sohasida tajribaga ega va taniqli brend bo‘lish bilan birga, TripAdvisor ma’lumotlariga ko‘ra Toshkentdagi eng yaxshi 10 ta umumiy ovqatlanish brendlari qatorida bo‘lishi lozim.
Birinchi joyda bir kvadrat metrning boshlang‘ich qiymati 785 ming so‘m, ikkinchi joyda 390 ming so‘mni tashkil etadi.
Shuningdek, uzoq yillardan buyon JUM brendi ostida faoliyat yuritib kelayotgan kafe uchun ijarachi qidirilmoqda.
Restoranda to‘liq faoliyat olib boruvchi oshxona mavjud. Umumiy maydoni 217 kvadrat metr bo‘lgan obyektning yillik boshlang‘ich qiymati 586,5 mln so‘mni tashkil etadi.
Uchib kelish zalida taksi xizmati uchun peshtaxta va ofis xonasi ham savdoga qo‘yilgan.
Ariza beruvchi kompaniya uch yildan ortiq bo‘lmagan benzinli avtomashinalar parkiga, shuningdek, kamida uch yillik tajribaga ega bo‘lgan haydovchilar tarkibiga ega bo‘lishi kerak.
Terminal oldidagi birinchi qatorda har doim kamida beshta mashina bo‘lishi lozim. Lotning yillik boshlang‘ich bahosi – 188,82 mln so‘m.
Barcha lotlar uchun batafsil texnik topshiriqlar belgilangan bo‘lib, barcha talabgor kompaniyalar ularga rioya qilishlari lozim. Aks holda, ijaraga beruvchi, kim oshdi savdosi yakunida g‘olib bo‘lgan kompaniya bilan shartnoma tuzishni rad etishga haqli.
Bundan tashqari, ijarachi kompaniyalar offshor zonalarda bank hisob raqamlariga (bu ularning ta’sischilariga ham tegishli), shuningdek soliq qarzlari va boshqa majburiy to‘lovlar bo‘yicha qarzdor bo‘lmasligi lozim.
Ijarachilarga qo‘yiladigan talablar va boshlang‘ich narxlar “E-auksion” veb-saytida har bir lot bo‘yicha mavjud.
Lotlarda, kimoshdi savdosi qoidalariga ko‘ra, auksion davomida kamida 10 foizga oshishi mumkin bo‘lgan boshlang‘ich yillik summalar ko‘rsatilgan.
