O‘zbekistonda 2023-yilda 14 ta oliy taʼlim muassasasida masofaviy taʼlim shakli joriy etilishi ma’lum qilindi.
AOKAda o‘tkazilgan brifingda Bilim va malakalarni baholash agentligi boshqarma boshlig‘i Abduvohob Hayitov abituriyentlarni onlayn ro‘yxatga olish yakunlari haqida maʼlumot berdi. Respublika bo‘yicha jami 89 ta davlat oliy taʼlim muassasasi hamda ularning hududlardagi 29 ta filial va fakultetlariga 1 018 007 nafar abituriyent ro‘yxatdan o‘tkazildi. Ularning 948 486 nafari test sinovida ishtirok etishi belgilandi.
Shuningdek, 14 ta oliy taʼlim muassasasida masofaviy taʼlim shakli joriy etilib, 6 834 nafar (birinchi taʼlim yo‘nalishiga nisbatan) abituriyent masofaviy taʼlim shaklida o‘qish istagini bildirdi. Shuningdek, 545 616 nafar abituriyent kunduzgi, 22 867 nafari kechki, 373 169 nafari sirtqi taʼlim shakli uchun ro‘yxatdan o‘tdi.
Eng ko‘p abituriyent ro‘yxatdan o‘tgan oliy taʼlim muassasalari (birinchi taʼlim yo‘nalishiga nisbatan):
- O‘zbekiston milliy universitetiga – 33 721 nafar;
- Toshkent davlat transport universitetiga – 28 474 nafar;
- Farg‘ona davlat universitetiga – 28 188 nafar.
Eng ko‘p abituriyent ro‘yxatdan o‘tgan hududlar (doimiy yashash hududi bo‘yicha):
- Qashqadaryo viloyati – 112 242 nafar;
- Samarqand viloyati – 105 805 nafar;
- Farg‘ona viloyati – 89 022 nafar.
Kirish test sinovlari ochiq va shaffof o‘tishini taʼminlash maqsadida keng jamoatchilik orasidan 3 500 nafarga yaqin nomzod guruh nazoratchisi sifatida jalb etiladi. Shuningdek, eshitish va nutqida nuqsoni bo‘lgan abituriyentlarni surdotarjimon xizmatlari bilan taʼminlash maqsadida 127 nafar surdotarjimon bilan shartnoma tuzildi.
Izoh (0)