“Sal kam 3 mlrd so‘m iqtisod qilindi”. Prezident bergan texnikalar dehqonobodliklar chiqimini kamaytirib, mushkulini oson qilayotgani aytilmoqda

Prezident Shavkat Mirziyoyev topshirig‘iga ko‘ra, Qashqadaryo viloyatining Dehqonobod tumaniga berilgan texnikalar tumandagi yo‘llar taʼmiri uchun ayni muddao bo‘layotgani, shuningdek, mahalliy budjet mablag‘lari iqtisod qilinishiga olib kelinayotgani aytilmoqda. Bu haqda “Daryo”ga hokimlik axborot xizmati xabar berdi.

Taʼkidlanishicha, tumanga prezident topshirig‘iga bilan 4 ta maxsus yo‘l qurilishi texnikasi ajratilgan bo‘lib, tumandagi tuproq yo‘llar shag‘allashtirilishida asqotmoqda.

Mazkur texnikalar yordamida 9 ta mahalladagi 40 km tuproq yo‘llar shag‘allashtirildi. Hashar yo‘li orqali bajarilayotgan 1 km yo‘l taʼmiriga o‘rtacha 800 litr yonilg‘i, yaʼni 12 million 400 ming so‘m mablag‘ sarflanmoqda. Mazkur 40 km yo‘l davlat dasturi orqali taʼmirlanganda 1 km yo‘lga 85 million so‘m mablag‘ sarflanar edi. Hozirda 40 km yo‘llarni hashar yo‘li orqali taʼmirlaganda 496 million so‘m xarj qilindi. Amalga oshirilgan yo‘llar taʼmiri dastur asosida amalga oshirilganda 3 milliard 400 million so‘m sarf qilinar edi. Hashar ishlar natijasida 2 milliard 900 mln so‘m mablag‘ iqtisod qilindi, — deydi hokimlik axborot xizmati xodimi Murod Amirov.

Qo‘shimcha qilinishicha, yil yakunigacha 120 km ichki yo‘llar shag‘allashtirishi rejalashtirilgan bo‘lib, natijada 8 milliard 702 million so‘m mablag‘ iqtisod qilinishiga erishilishi kutilmoqda.