Farg‘ona viloyatining Marg‘ilon shahrida Yusufjon qiziq Shakarjonov nomidagi respublika askiya va qiziqchilik sanʼati markazi tashkil etildi. Bu haqda shahardagi Ijodkorlar bog‘ida milliy askiyachilik va qiziqchilik sanʼatini yanada rivojlantirish maqsadida o‘tkazilgan uchrashuvda maʼlum qilindi, deb xabar bermoqda Azizjon Ermatov.
.JPG)
Qayd etilishicha, O‘zbekiston Prezidentining “Respublika milliy askiya va qiziqchilik sanʼatini yana-da rivojlantirish chora-tadbirlari to‘g‘risida”gi qarori ijrosiga qaratilgan uchrashuv so‘z ustalarining ichakuzdi askiyalari bilan boshlangan.
Vodiy viloyatlari askiya va qiziqchilik sanʼati ustalari, soha mutaxassislari jalb etilgan tadbirda Madaniyat va turizm vaziri Ozodbek Nazarbekov hamda Prezident Administratsiyasi madaniyat va sanʼatni rivojlantirish sho‘basi mudiri Nodirbek Sayfullayev ishtirok etgan.
.JPG)
Uchrashuv davomida viloyat Madaniyat va turizm boshqarmasida bo‘lim boshlig‘i sifatida faoliyat olib borayotgan Shamsiddin Babajanov markaz direktori vazifasini bajaruvchi etib tayinlandi. Shuningdek, O‘zbekiston Respublikasida xizmat ko‘rsatgan artist, so‘z ustasi Mamasiddiq Sherayev esa markaz badiiy rahbari sifatida tanishtirildi.
Askiyachilik hazil-mutoyiba sanʼat turi sifatida 2014-yili YUNESKOning Insoniyat nomoddiy madaniy merosi ro‘yxatiga kiritilgan.
Izoh (0)