“Yangi O‘zbekiston Konstitutsiyasi” yagona milliy portali o‘z faoliyatini boshladi

Adliya vazirligining xabar qilishicha, o‘zbek va xorijiy tillarda “Yangi O‘zbekiston Konstitutsiyasi” yagona milliy portali o‘z faoliyatini boshladi.

Mazkur portal orqali qonunchilikni yangi tahrirdagi konstitutsiyaga muvofiqlashtirish hamda uni amalga oshirishda yuzaga kelayotgan muammolarni bartaraf etish bo‘yicha takliflar qabul qilinadi.

Shunga ko‘ra, fuqarolar konstitutsiyadagi har bir modda bo‘yicha takliflarini qoldirishi mumkin.

"Jarayonda takliflaringiz bilan faol ishtirok eting va qonunchilik mustahkamlanishida o‘z hissangizni qo‘shing", — deyiladi vazirlik xabarida.

Avvalroq Oliy Majlis Senati a’zosi Shavkat Ayupov yangilangan Konstitutsiya yuzasidan fikr bildira turib, hozirgi asosiy maqsad yangi Konstitutsiyani yaxshilab o‘rganish ekanligini aytib o‘tgandi.

"O‘ylaymanki, hozirgi asosiy maqsadimiz yangi Konstitutsiyani yaxshilab o‘rganish. Ayniqsa, yoshlar uchun kerak. Chunki asosiy qomusdan to‘g‘ri foydalanish uchun har birimiz uni batafsil o‘rganib chiqishimiz kerak. Yangi olgan ma’lumotlarga asoslanib, qaytadan ish boshlaymiz”, — dedi Shavkat Ayupov.