Президент Шавкат Мирзиёев топшириғига кўра, Қашқадарё вилоятининг Деҳқонобод туманига берилган техникалар тумандаги йўллар таъмири учун айни муддао бўлаётгани, шунингдек, маҳаллий бюджет маблағлари иқтисод қилинишига олиб келинаётгани айтилмоқда. Бу ҳақда “Дарё”га ҳокимлик ахборот хизмати хабар берди.
Таъкидланишича, туманга президент топшириғига билан 4 та махсус йўл қурилиши техникаси ажратилган бўлиб, тумандаги тупроқ йўллар шағаллаштирилишида асқотмоқда.
Мазкур техникалар ёрдамида 9 та маҳалладаги 40 км тупроқ йўллар шағаллаштирилди. Ҳашар йўли орқали бажарилаётган 1 км йўл таъмирига ўртача 800 литр ёнилғи, яъни 12 миллион 400 минг сўм маблағ сарфланмоқда. Мазкур 40 км йўл давлат дастури орқали таъмирланганда 1 км йўлга 85 миллион сўм маблағ сарфланар эди. Ҳозирда 40 км йўлларни ҳашар йўли орқали таъмирлаганда 496 миллион сўм харж қилинди. Амалга оширилган йўллар таъмири дастур асосида амалга оширилганда 3 миллиард 400 миллион сўм сарф қилинар эди. Ҳашар ишлар натижасида 2 миллиард 900 млн сўм маблағ иқтисод қилинди, — дейди ҳокимлик ахборот хизмати ходими Мурод Амиров.
Қўшимча қилинишича, йил якунигача 120 км ички йўллар шағаллаштириши режалаштирилган бўлиб, натижада 8 миллиард 702 миллион сўм маблағ иқтисод қилинишига эришилиши кутилмоқда.
Изоҳ (0)