Qashqadaryo viloyatining Qarshi shahridagi “Komilon” mahallasi Universitet ko‘chasida yashovchi aholi vakillari hududdan olti qavatli mehmonxona qurilgani va bu mehmonxona derazalarining ular yashayotgan xonadon hovlisiga qaraganidan norozi bo‘lmoqda.
Yangi qurilgan binoning 21 ta derazasi va ikkita eshigi bizning hovlimizga qaragani sabab, hovlimizdan tashqariga emin-erkin kirib chiqolmaymiz. Kelinlarimiz bor, yosh qizlarimiz bor. Qishda hovlimizga quyosh tegmaydi. Hammasi mayli, ammo bino derazasining aynan bizning hovlimizga qarashi bizga noqulaylik tug‘dirmoqda. Yopib berishsin, — deydi holatdan norozi bo‘lgan xonadon egasi Maryam Ko‘charova.
Uning turmush o‘rtog‘i Ibrohim Yoqubov xonadoni xuddi zooparkdek tomosha maydoniga aylanganidan shikoyat qilmoqda.
Katta kelinimiz farzandli bo‘lgach, bu yerdagi vag‘ur-vug‘urdan bezor bo‘lib, bolasini uxlatolmay ketib qoldi. Soat kechasi 12 gacha bolgarka ishlaydi, ovozidan bezor bo‘ldik. Xuddi zooparkka qaragandek, 80 ta ko‘z bizning hovlimizga qarab o‘tiradi. Nos tuflaydi. Hojatxonaga chiqmoqchi bo‘lgan kelinlarimiz boshiga lagan yopib o‘tyapti, tosh tushmasin deb. Shiferimizning yarmi yo‘q. Hojatxonamiz suvga to‘ldi, — deydi mazkur holatdan norozi bo‘lgan xonadon egasi Ibrohim Yoqubov.
Shu hududda joylashgan noturarjoy bino mulkdori Dilfuza Qodirova ham mazkur bino derazalari noturarjoy obyekti tomon qaraganidan noroziligini aytmoqda.
Bu bino derazalari noturarjoy binomizning hovli tomoniga qaragan. Mazkur holat bo‘yicha masʼul tashkilotlarga murojaat qildim. Qurilish boshqarmasidagilar ham bu bino qurilishidan avval qo‘shnilardan rozilik olinishi kerakligini, derazasi hovlimiz tomonga qarashidan ogohlantirib, biz bilan kelishib qilishi lozimligini aytmoqda. Biroq, bizdan bu bo‘yicha so‘ralmagan, kelishilmagan. Demakki, qonunga zid harakat qilinyapti. Shu sabab quruvchiga murojaat qilib, bu holatni bartaraf etishini so‘radik. Ammo natija yo‘q. Bu bo‘yicha murojaat qilmagan joyimiz, tashkilotimiz qolmadi. Qurilish boshqarmasi esa sudga berishni tavsiya qilmoqda, — deydi mulk egasi.
Dilfuza Qodirova noturar binodan hovli sifatida ham foydalanishini, mulkidan foydalana olmayotganini aytmoqda.
Quruvchi olti qavat emas, xohlasa o‘n qavatli bino qursin. Bunga eʼtirozimiz yo‘q. Lekin bizning hovlimiz tomon ko‘rinishini cheklashlarini, derazalarini yopishlarini so‘raymiz. Biz hovlidan foydalana olmayapmiz. Yoz kunida hovlida o‘tirishimiz bor, emin-erkin yurolmaymiz. Ustalari qarab o‘tiradi, balki biror nima tashlashlari mumkin. Xavfsizligimiz ham taʼminlanmaydi bu holatda, — deydi u.
Murojaatchining aytishicha, bu ish bo‘yicha sudga ham murojaat qilingan.
To‘rt marta sud bo‘ldi. Ikki marta sud majlisida qatnashgandim. Sudya “Bizda hozircha hujjatlar yetarli emas. Biz sudyamiz, quruvchi yoki mutaxassis emas, bizga arxitektura qanday xulosa bersa, shunga qarab xulosa qilamiz”, deyishgandi. Lekin oxirgi sudda bizni ham chaqirmay, murojaatimizni rad qilishgan. Sudga pochta orqali chaqiruv qog‘ozini yubordik deyishdi. Lekin yuborishmagan ekan. Sud bizning ishtirokimizsiz o‘tkazilgan va shikoyatimizni rad qilishgan, — deydi Dilfuza Qodirova.
Murojaatchilarning aytishicha, quruvchi ularning hovlisini sotib olishga ham uringan.
Quruvchi bizga dallol yuborib, somsachilarni yuborib, uyingizga uy beraylikmi yoki sotib olaylikmi deb, bizga derazasini yopib berishsin, boshqa hech narsa kerak emas, — deydi Ibrohim Yoqubov.
O‘zini Otabek Murodov deb tanishtirgan xonadon egasi ham mazkur bino derazalarining hovlisiga qarashi ayoli va onasiga noqulaylik tug‘dirayotganini aytmoqda.
Uyda ayolim va onam bilan birga yashaymiz. Ular erkin kirib chiqolmaydi. Kechasi shovqin-suron ham bezovta qilyapti, — deydi Otabek Murodov.
Xonadon egalari binoda qurilish ishlari ketayotgani sabab, nabiralari hovlida emin-erkin o‘yin o‘ynagani ham qo‘rqib qolganini aytmoqda.
Qurilish ishlari ketayotgani bois, nabiralarimiz hovlida o‘ynashga qo‘rqadi. Shumi haqiqat? Bizga yordam bering, iltimos, — deydi fuqaro.
“Daryo” mazkur holat bo‘yicha aholi eʼtiroziga sabab bo‘layotgan mehmonxona quruvchisi Oybek Olimov bilan ham suhbatlashdi.
Ayni paytda qurilish ishlari yakun bo‘lgan. Shovqin-suron bo‘lmaydi. Binomizni qurishdan avval barcha tashkilotlardan ruxsat olganmiz. Barchasi qonuniy. Bizga hech kim binoni qurishdan avval aholi bilan kelishasan, ularning roziligini olasan deyishmagan. Shu sabab mehmonxona va savdo kompleksimizni qurib bitkazdik, — deydi quruvchi.
Murojaatchilarning bu haqidagi shikoyatiga javob bergan Qashqadaryo viloyati Qurilish bosh boshqarmasi masʼullari “Qutlug‘ qadam” MCHJ binoni qurishdan avval ular bilan kelishishi kerakligini maʼlum qilgan. Mutasaddilarning javob xatida “Har qanday bino qurilishi qo‘shni uchastka egalari bilan kelishilishi, turar joy uyi va xo‘jalik binolarining qo‘shni uchastkalardan ko‘rinish panaligi taʼminlanishi kerak”, — deb javob qaytargan.
“Daryo” voqealar rivojini kuzatishda davom etadi.
Izoh (0)