AQSH Moliya vazirligi 20-iyul kuni Qirg‘izistonning to‘rtta kompaniyasiga qarshi sanksiyalar e’lon qildi. Bu haqda AQSH Moliya vazirligining press-relizida aytiladi. Qayd etilishicha, ushbu kompaniyalar orqali Rossiya G‘arb davlatlari tomonidan kiritilgan cheklovlarni chetlab o‘tib, ikki maqsadli tovarlar va texnologiyalarni olgan.
Rossiyaning Ukrainaga keng ko‘lamli bosqini boshlanganidan beri Qirg‘izistonda joylashgan korxonalar Rossiyaga ko‘plab elektron komponentlar va boshqa texnologiyalarni eksport qilgan, ularning bir qismini Rossiya mudofaa sektori korxonalari olgan, deyiladi bayonotda.
Shu munosabat bilan Qo‘shma Shtatlar Qirg‘izistonda ro‘yxatdan o‘tgan, 2022-yil mart oyida tashkil etilgan, “Rossiyaga ikki maqsadli tovarlarni faol yetkazib beruvchi” PM Dezayn and Development kompaniyasiga nisbatan sanksiyalar kiritdi.
Kompaniya yuzlab tovarlarni, jumladan yarimo‘tkazgichlar, elektron integral mikrosxemalar va kondansatorlarni Rossiyaning bir qancha kompaniyalariga yuborgan — AQSH ularni ham sanksiyalar ro‘yxatiga kiritgan.
Bundan tashqari Qirg‘izistonning Progress Lider, GTM Texnologii, “Kargolayn” kompaniyalari AQSH sanksiyalari ostiga tushdi.
19-iyul kuni The Washington Post gazetasi AQSH Rossiyaga nisbatan joriy etilgan sanksiyalarni buzgani uchun Qirg‘izistonga qarshi iqtisodiy choralar ko‘rayotgani haqida xabar bergandi. Nashrning yozishicha, Vashington Bishkekni Rossiyaga Xitoy dronlarini yetkazib berishda gumon qilmoqda.
Qirg‘iziston Milliy xavfsizlik davlat qo‘mitasi Qirg‘iziston hukumati va davlat korxonalari AQSH tomonidan Rossiyaga qarshi joriy qilingan sanksiyalarni buzmaganini, biroq bunga xususiy kompaniyalar aloqador bo‘lishi ham mumkinligini ta’kidladi. Qo‘mita ushbu holat yuzasidan tekshiruv boshladi.
Qirg‘iziston bosh vaziri Oqilbek Japarov respublikada mahsulotlarning sanksiyalarni buzgan holda eksport qilinishiga yo‘l qo‘ymaslik choralari ko‘rilganini aytdi.
Izoh (0)