Rossiya prezidenti matbuot kotibi Dmitriy Peskov AQSHning Qirg‘izistonga qarshi qo‘llashi mumkin bo‘lgan sanksiyalariga munosabat bildirdi. Bu haqda “Rossiyskaya gazeta” xabar berdi.
Peskovga ko‘ra, Kreml AQSHning ehtimoliy sanksiyalari sababli Rossiya va Qirg‘iziston o‘rtasidagi savdo-iqtisodiy aloqalarda xavf-xatar yuzaga kelishini ko‘rmayapti.
“Qirg‘iziston bizning yaqin hamkorimiz va ittifoqchimiz ekanidan tashqari, bizni ilg‘or integratsiya jarayonlaridagi ishtirokimiz ham birlashtiradi. Gap Yevrosiyo iqtisodiy ittifoqi haqida ketmoqda. Aynan shu integratsiya Qirg‘izistonning o‘ziga katta foyda keltiradi”, — dedi u jurnalistlarga
Kreml rasmiysi Qirg‘iziston iqtisodiyoti, albatta, ushbu integratsiya jarayonining yanada rivojlanishidan manfaatdor ekanini ta’kidladi.
“Biz Qirg‘iziston bilan o‘zimiz uchun yuksak qadrlaydigan ikki tomonlama munosabatlarimizni, shuningdek, qo‘shma integratsiyaning barcha formatlarini yanada rivojlantirish niyatidamiz”, — dedi Peskov.
AQSHning Qirg‘izistonga qarshi ehtimoliy sanksiyalari
AQSH Qirg‘izistonga nisbatan sanksiyalar joriy etishga tayyorlanmoqda. Vashingtondagi ma’lumotlarga ko‘ra, Rossiyaga Xitoydan dron singari sanksiyalar ostidagi mahsulotlar Qirg‘iziston orqali yetkazib beriladi.
“Rossiya qo‘shinlarining Ukrainaga bostirib kirishi vaqtida va undan keyin qo‘yilgan sanksiyalardan so‘ng Rossiya va Markaziy Osiyo davlatlari o‘rtasidagi savdo hajmi g‘ayritabiiy darajada o‘sdi. Rossiyaga bevosita eksport qilish sanksiyalar bilan cheklangan mahsulotlar Moskvaga Markaziy Osiyo davlatlari, jumladan, Qirg‘iziston orqali yetkazib beriladi”, — deb yozadi The Washington Post.
The Washington Post nashri izoh olish uchun Qirg‘izistonning AQSHdagi elchixonasi bilan bog‘langan. Ular nashrga mamlakat noqonuniy savdoga qarshi kurashga qat’iy sodiq ekanini ta’kidlagan.
Izoh (0)