Индонезия ҳукумати 12 нафар гумонланувчини, жумладан, полиция ва иммиграция хизмати ходимини 122 нафар инсоннинг буйрагини сотиш мақсадида Камбоджага олиб борганликда айблаб, ҳибсга олди, деб хабар бермоқда The Star.
Гумонланувчилар Индонезиянинг одам савдоси бўйича қонунини бузганликда айбдор деб топилса, 15 йилгача қамоқ жазоси ва 600 миллион рупийгача (тахминан 40 минг доллар) жаримага тортилиши мумкин.
“Қўлга олинганлар бутун Индонезиядан одамларни ижтимоий тармоқлар орқали ёллаб, Камбоджага буйрак кўчириб ўтказиш учун жўнатганликда айбланган”, — деди Жакарта полициясининг жиноий қидирув бўлими директори Хенки Харяди.
Жиноий схема қурбонларининг ҳар бирига 135 миллион рупий (9000 доллар) ваъда қилинган.
"Жабрланувчилар пулга муҳтож бўлгани учун буйракларини сотишга рози бўлишган. Уларнинг кўпчилиги пандемия пайтида ишидан айрилган одамлар", деди Харяди.
2019 йилда Индонезия ҳукумати мамлакатдаги энг йирик одам савдоси иши бўйича саккиз кишини ҳибсга олганди. Ўшанда 1200 га яқин инсон ички тана аъзоларини сотиш учун хорижга олиб кетилган.
Изоҳ (0)