Germaniya O‘zbekiston va yana olti davlatga 20 mln yevro ajratmoqda

O‘zbekiston va yana olti davlat binolarning energiya samaradorligini oshirish uchun 20 million yevro oladi. Bu haqda BMT axborot xizmati xabar berdi.

Ma’lumotlarga ko‘ra, Birlashgan Millatlar Tashkilotining (BMT) Yevropa iqtisodiy komissiyasi hamkorlar bilan birgalikda Sharqiy Yevropa va Markaziy Osiyoda qurilish sanoatida energiya samaradorligini oshirish bo‘yicha yirik loyihani ishga tushirgan. Loyihadan ko‘zlangan maqsad ushbu mamlakatlarda yuqori unumdorlikdagi binolar qurilishini ta’minlashdan iborat.

“Loyiha g‘oyasi binolarni qurishda foydalaniladigan materiallar va jihozlarning energiya samaradorligini oshirishdan iborat. Ya’ni, biz yuqori samarali bino qurish uchun zarur shart-sharoitlarni olamiz. Bu qurilish materiallari va uskunalarini ishlab chiqarish, binoning qurilishi boshlanishidan oldin birinchi bosqichda bajarilishi kerak bo‘lgan hamma narsani o‘z ichiga oladi”, — dedi BMT YIK mintaqaviy maslahatchisi Oleg Dzyubinskiy.

Uning so‘zlariga ko‘ra, hozirda dastlabki bosqich davom etmoqda, uning doirasida donor uchun to‘liq loyiha taklifi ishlab chiqilishi kerak. Loyihada ishtirok etuvchi benefisiar davlatlar Armaniston, Gruziya, Qirg‘iziston, Moldova, Tojikiston, Ukraina va O‘zbekiston hisoblanadi. Donor — Germaniya; loyihani moliyalashtirish miqdori deyarli 20 million yevroni tashkil etadi. Miqdor ishtirokchilar o‘rtasida taqsimlanadi.