Samarqandning 7 ta tumanida qotillik, bir shahar va 4 ta tumanida esa nomusga tegish jinoyati sodir etilmagani maʼlum qilindi

2023-yilning o‘tgan olti oyi davomida Samarqand viloyatining 7 ta tumanida qotillik, bir shahar va 4 ta tumanida esa nomusga tegish jinoyati sodir etilmagani maʼlum qilindi. Bu haqda viloyat IIBda Ichki ishlar vaziri o‘rinbosari Najmiddin To‘raxo‘jayev hamda viloyat IIB boshlig‘i Rahmat Mamatovlar ishtirokidagi yig‘ilishda maʼlum qilingan.

Taʼkidlanishicha, masʼullar ishtirokidagi yig‘ilishda 2023-yilning olti oyi davomida viloyat hududida jinoyat va huquqbuzarliklarning barvaqt oldini olish, jamoat tartibini saqlash va yo‘l harakati xavfsizligini taʼminlash borasida amalga oshirilgan ishlar hamda yo‘l qo‘yilgan kamchiliklar, shaxsiy tarkib tomonidan xizmat intizomi, qonunchilikka rioya etilishining ahvoli hamda bu borada yo‘l qo‘yilayotgan kamchiliklar muhokama qilingan.

Aytilishicha, Samarqandda 2023-yilning o‘tgan olti oyi mobaynida 3926 ta jinoyat sodir etilgan bo‘lib, shundan 91,9 foizi, yaʼni 3607 tasi fosh etilgan.

Yig‘ilishda,  shuningdek, o‘tgan fursat davomida viloyatning Bulung‘ur, Jomboy, Narpay, Nurobod, Payariq, Paxtachi va Qo‘shrabot tumanlarida birorta ham qotillik jinoyati sodir etilmagani, Kattaqo‘rg‘on shahri, Narpay, Payariq, Samarqand va Qo‘shrabot tumanlarida esa nomusga tegish jinoyatiga qo‘l urilmagani maʼlum qilingan.

Paxtachi, Toyloq, Qo‘shrabot tumanlarida og‘ir tan jarohati yetkazish, Kattaqo‘rg‘on shahri, Bulung‘ur, Jomboy, Ishtixon, Kattaqo‘rg‘on, Narpay, Nurobod, Oqdaryo, Payariq, Past Darg‘om va Qo‘shrabot tumanlarida esa talonchilik, Nurobod hamda Toyloq tumanlarida bezorilik jinoyati sodir etilishiga yo‘l qo‘yilmagan. Tezkor-qidiruv tadbirlari natijasida umumiy jinoyatlarning 91,9 foizi fosh etilib, 231 nafar qidiruvdagi shaxslar ushlangan, — deydi yig‘ilishda qatnashgan viloyat IIB axborot xizmati rahbari Jahongir Sagdullayev.