Rossiya harbiylarining Ukraina janubiga bergan zarbalari oqibatida Chernomorsk portidagi 60 ming tonna don yo‘q qilindi. Bu haqda Ukraina agrar siyosat vaziri Nikolay Solskiy xabar berdi.
U tungi hujum Chernomorsk portidagi don eksporti infratuzilmasining muhim qismini ishdan chiqarganini aytdi.
“Mutaxassislarning fikricha, shu kechada zarar ko‘rgan obyektlarni to‘liq tiklash uchun kamida bir yil kerak bo‘ladi. Chernomorsk portida 60 ming tonna g‘alla ham yo‘q qilindi, ular katta tonnajli kemaga ortilib, 60 kun avval don yo‘lagi orqali jo‘natilishi kerak edi”, — dedi u.
Solskiy dunyoni Rossiyaning fuqarolik port infratuzilmasiga bergan zarbalariga keskin munosabat bildirishga chaqirdi.
“Agar oziq-ovqat mahsulotlarini eksport qila olmasak, eng qashshoq mamlakatlar aholisi omon qolish yoqasida qoladi! Bundan tashqari, nafaqat Ukraina, balki dunyo iqtisodiyoti ham zarar ko‘radi. G‘alla narxi ko‘tariladi, hamma mamlakatlar ham qishloq xo‘jaligi mahsulotlarini sotib olishga qurbi yetmaydi, demak, oziq-ovqat mahsulotlari: un, don, go‘sht narxi sezilarli darajada oshadi”, — dedi u.
Izoh (0)