Quyoshda tez-tez sodir bo‘layotgan kuchli chaqnashlar sababi ma’lum qilindi

Quyosh faolligi sikli o‘zining eng yuqori cho‘qqisiga yaqinlashmoqda, shu bois Quyoshda kuchli chaqnashlar tez-tez sodir bo‘la boshladi, dedi Rossiya Fanlar akademiyasi Kosmik tadqiqotlar instituti yetakchi ilmiy xodimi Natan Eysmont “Interfaks”ga bergan intervyusida.

“Biz quyosh faolligining yoqimli bo‘lmagan siklini boshdan kechirmoqdamiz, biz maksimal quyosh faolligiga yaqinlashmoqdamiz”, dedi Eysmont yaqinda sodir bo‘lgan quyosh chaqnashlari haqidagi savolga javob berar ekan.

Unga ko‘ra, ikki yildan so‘ng Quyosh faolligi sikli o‘zining eng yuqori cho‘qqisiga chiqadi.

Eysmontning ta’kidlashicha, quyosh chaqnashlari tufayli “Yerda turli muammolar yuzaga keladi, masalan, aloqadagi uzilishlar, elektr uzatish liniyalarining ishlashidagi muammolar” va hokazo. Bu muammolar global xarakterga ega bo’lishi ham mumkin.

“Bunday paytda turli surunkali kasalligi bor odamlar ehtiyot bo‘lishlari kerak. Boshqa ta’sirlar haqida gapiradigan bo‘lsak, shuni yodda tutish kerakki, hozir Yer atrofida minglab kosmik kemalar uchmoqda va ularning ba’zilari bunday ta’sirga juda sezgir. Ular ishdan chiqishlari mumkin, — dedi olim.