Niderlandiya yaqin orada ta’mirlangan M113 zirhli transportyorlarini Ukrainaga yuboradi, dedi mudofaa vaziri Kaysa Ollongren Twitter’da.
“Tez orada biz ta’mirlangan M113 zirhli texnikalarini Ukrainaga jo‘natamiz”, — deb yozdi vazir.
Uning so'zlariga ko'ra, ushbu bronetransportyorlar Ukrainaga askarlarni tashishda yordam beradi. Ollongren Niderlandiya Belgiya va Lyuksemburg bilan ushbu bronetransportyorlarni yetkazib berish bo‘yicha yaqindan hamkorlik qilayotganini ta’kidladi.
Ukrainada urush boshlanganidan beri Niderlandiya Ukrainaga 45 ta T-72 tanklari, Daniya va Germaniya bilan birgalikda 100 ga yaqin Leopard 1 tanklari, 196 YPR piyoda jangovar mashinalari, sakkizta PzH2000 artilleriya moslamalari, ikkita Patriot zenit-raketa komplekslarini yetkazib berdi. Shuningdek, raketalar, minomyotlar, miltiqlar, pulemyotlar va har xil turdagi o'q-dorilar ham berilgan.
2024-yilda Niderlandiya Daniya bilan birgalikda Ukrainaga Germaniyaning 14 ta Leopard 2 tankini topshirishni rejalashtirmoqda. Iyul oyigacha Niderlandiyadan Ukrainaga yetkazilgan harbiy yordamning umumiy miqdori 1,9 milliard yevroni tashkil qildi.
Izoh (0)