Ukraina hududi Ukraina armiyasining o‘zi uchun ham, G‘arbdagi hamkorlari uchun “jangovar laboratoriya”ga aylandi. Bu haqida Britaniya mudofaa vaziri Ben Uolles Sky News telekanaliga bergan intervyusida aytib o‘tdi.
Uning qayd etishicha, ukrainaliklar va ularning g‘arbiy ittifoqchilari rus askarlariga qarshi kurashish uchun yangi qurol va texnologiyalarni sinab ko‘rishlari kerak. Uollesning so‘zlariga ko‘ra, “omon qolishga bo‘lgan xohish” ukrainaliklarni ittifoqchilar taklif qilayotgan yangi qurol va modifikasiyalarni sinovdan o‘tkazish uchun tinchlik davridagi me’yor va qoidalardan voz kechishga majbur qilgan.
Ular tavakkal qilishlari va ishlashi yoki ishlamasligi noaniq bo‘lgan narsalar bilan tajriba o‘tkazishlari kerak edi. Ular o‘z qurolli kuchlari uchun jangovar laboratoriyaga aylandilar va bu bizga yo‘l ko‘rsatdi. Men buni yuzaga keltirgan holatlardan afsusdaman, lekin bu tajriba 21-asrda yangicha jang maydonida qanday harakat qilish kerakligini ko‘rsatdi, — dedi Uolles.
Shoshilinch ravishda ishlab chiqilgan va Rossiya—Ukraina urushi frontiga yuborilgan bunday eksperimental qurolga misol sifatida nashr Wolfram raketasini keltirgan.
Izoh (0)