Surxondaryo viloyati Denov shahrida 395 kg iste‘molga yaroqsiz go‘sht mahsulotlari olib ketayotgan haydovchilar to‘xtatib qolindi. Bu haqda viloyat IIB axborot xizmati xabar berdi.
Unga ko‘ra, holat viloyat Darband yo‘l-patrul xizmati maskanida olib borilgan tezkor tadbir davomida aniqlangan. Biri Denov, biri Sho‘rchi tumanlaridan Toshkent shahriga ketayotgan ikki haydovchi aka-uka bo‘lib chiqqan. Haydovchining so‘zlariga ko‘ra, ular yetkazib berish hisobiga go‘shtning bir kilogrammi uchun ikki ming so‘mdan pul olgan.
“Kilosiga 2 ming so‘mdan beradi. Chorsuga olib borishim kerak edi. Yaroqli yoki yaroqsiz ekaniga qaramaganman”, — deydi ulardan biri.
Qayd etilishicha, 395 kg iste‘mol uchun yaroqsiz bo‘lgan ot va mol go‘shtlari viloyat hayvonlar kasalliklari tashxisi va oziq-ovqat mahsulotlari xavfsizligi davlat markazi laboratoriyasida tekshirildi. Shundan so‘ng ushbu go‘sht mahsulotlari Termiz hayvonot bog‘iga topshirildi. Haydovchilarga nisbatan ma‘muriy bayonnoma rasmiylashtirildi.
Izoh (0)