Toshkent viloyatida shifokorlar ruxsatisiz kasalxonadan ketib qolgan shaxs 10 yilgacha ozodlikdan mahrum qilinishi mumkin

Toshkent viloyatida kasalxonadan uyiga yetib olish maqsadida o‘zganing mashinasini minib qochgan shaxsga jinoyat ishi qo‘zg‘atildi.

IIV Tergov departamentining ma’lum qilishicha, 35 yoshli U.M. Chirchiq shahar Gulyayeva ko‘chasida Nexia-3 egasi eshiklarni ochiq holda, kalitni o‘t oldirgichda qoldirib, do‘konga kirib ketganini ko‘rib, avtomashinani nomaʼlum tomonga olib qochib ketgan.

Mashinani Alisher Navoiy ko‘chasida boshqarib kelayotib, Nexia-2 orqa tomonidan urib, yo‘l-transport hodisasi sodir etgan va Chirchiq shahar IIB JQB xodimlari tomonidan ushlangan.

Mazkur holat yuzasidan Chirchiq shahar IIB huzuridagi Tergov bo‘limi tomonidan U.M.ga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. Ushbu moddada 5 yildan 10 yilgacha ozodlikdan mahrum qilish jazosi ko‘zda tutilgan.

Jinoyat ishi doirasida gumonlanuvchi so‘roq qilinib, undan nima sababdan ushbu jinoyatga qo‘l urgani so‘ralgan. U Chirchiq shahar Gulyayeva ko‘chasida joylashgan shifoxonada oyog‘ini davolatgani va uyga ketish istagini shifokorlarga maʼlum qilganida, shifokorlar unga ruxsat bermaganidan jahli chiqib, ko‘chaga chiqib mazkur avtomashinani ko‘rib uyiga yetib olish maqsadida olib qochganini bayon etgan.

Hozirda gumon qilinuvchining ko‘rgazmalari tekshirilib, uning ruhiy sog‘lomligi tekshirilmoqda. Tergov harakatlari davom etmoqda.