Rossiya Ukraina armiyasi safida jang qilayotgan o‘zbekistonlikni qidirmoqda

Rossiya Tergov qo‘mitasi “maxsus harbiy operatsiya” zonasida Ukraina Qurolli kuchlari tomonida jang qilayotgan 178 nafar xorijiy fuqarolarga nisbatan jinoiy ish qo‘zg‘atdi. Bu haqda “TASS”ga qo‘mita matbuot xizmati xabar berdi.

Ma’lum qilinishicha, ushbu yollanma askarlar 30 dan ortiq davlat, jumladan, AQSH, Buyuk Britaniya, Italiya, Belgiya, Daniya, Shvetsiya, Boltiqbo‘yi davlatlari, Finlyandiya, Fransiya, Niderlandiya, Albaniya, Bolgariya, Janubiy Koreya, Namibiya, Peru, O‘zbekiston, Isroil , Gruziya, Braziliya va boshqalar fuqarosi hisoblanadi.

Hozirda Rossiya Tergov qo‘mitasi tergovchilari ushbu shaxslarni qidirmoqda.

“Ukraina Qurolli kuchlari tomonida yollanma askarlarni yollash va jangovar harakatlarda ishtirok etish bo‘yicha jinoyat ishini tergov qilish doirasida so‘nggi ikki hafta ichida yana 18 nafar xorijlikni sirtdan sudlanuvchi sifatida jalb qilish to‘g‘risida qarorlar qabul qilindi”, — deyiladi xabarda. 

Bundan tashqari Rossiya Tergov qo‘mitasi Ukraina sobiq mudofaa vaziri Andrey Zagorodnyukga sirtdan ayblov bergani ma’lum bo‘ldi.