Toshkent davlat iqtisodiyot universitetining 1 ming 300 nafar talabasi norasmiy ravishda turli korxonalarda ishlamoqda. Bu haqda universitet rektori Kongratbay Sharipov “Daryo” muxbirining savoliga javoban ma’lum qildi.
OAV vakillari uchun tashkil etilgan matbuot anjumanida Kongratbay Sharipov talabalar ish bilan qanday ta’minlanayotgan haqida ma’lumot bergan.
“Bitiruvchilarni ish bilan taʼminlash darajasi yomon emas. Deyarli 89-96 foizgacha bitruvchi yillar davomida ishga joylashib ketadi. Hammasi ham davlat ishiga kirmaydi. Talabalarimiz ichida so‘rovnoma o‘tkazganimizda ulardan 1 ming 300 nafari norasmiy ravishda ishlayotgani aniqlandi. Ular ishini topgan. Ularni rasmiy tartibda ishlashga o‘tkazish bo‘yicha ishlar olib borilyapti” — dedi rektor.
Ma’lum qilinishicha, universitetda jami 22 ming 212 nafar talaba tahsil oladi. Bu yil oliygohni 4 ming 791 talaba tamomladi.
“Hozir talabalar soni ko‘payib ketdi. Buning ham yaxshi, ham yomon tomonlari bor. Yomon tomoni davlat tashkilotlari soni u qadar ko‘paymagani sabab amaliyot o‘tkazadigan joylar kam. Albatta, bunga yechim qidiryapmiz. Universitet fakultetlari qoshida malakani shakllantiradigan markazlar ochilyapti. Lekin hamma yo‘nalishda ham buni qila olmayapmiz. Masalan, iqtisodiyot yo‘nalishida o‘qiydigan talaba vazirlik yoki hokimiyatga borishi kerak. Hozir bu yo‘nalishda ikki mingdan ortiq talabalarimiz bor. Xuddi shunaqa Milliy, Moliya, Sharqshunoslik va boshqa deyarli barcha universitetlarda menejment, iqtisodiyot va marekting yo‘nalishlari ochilgan. Davlat tashkilotlari ularning hammasini sig‘dirishi qiyin”, — dedi universitet rahbari.
Avvalroq Oliy taʼlim, fan va innovatsiyalar vazirligi departament boshlig‘i Abduvali Xoliqov “Daryo” muxbiri bilan suhbatda O‘zbekistondagi oliy ta’lim muassasalari bitiruvchilarining 86 foizi o‘zi o‘qigan sohada ishlayotganini aytgandi.
Izoh (0)