Тошкент давлат иқтисодиёт университетининг 1 минг 300 нафар талабаси норасмий равишда турли корхоналарда ишламоқда. Бу ҳақда университет ректори Конгратбай Шарипов “Дарё” мухбирининг саволига жавобан маълум қилди.
ОАВ вакиллари учун ташкил этилган матбуот анжуманида Конгратбай Шарипов талабалар иш билан қандай таъминланаётган ҳақида маълумот берган.
“Битирувчиларни иш билан таъминлаш даражаси ёмон эмас. Деярли 89-96 фоизгача битрувчи йиллар давомида ишга жойлашиб кетади. Ҳаммаси ҳам давлат ишига кирмайди. Талабаларимиз ичида сўровнома ўтказганимизда улардан 1 минг 300 нафари норасмий равишда ишлаётгани аниқланди. Улар ишини топган. Уларни расмий тартибда ишлашга ўтказиш бўйича ишлар олиб бориляпти” — деди ректор.
Маълум қилинишича, университетда жами 22 минг 212 нафар талаба таҳсил олади. Бу йил олийгоҳни 4 минг 791 талаба тамомлади.
“Ҳозир талабалар сони кўпайиб кетди. Бунинг ҳам яхши, ҳам ёмон томонлари бор. Ёмон томони давлат ташкилотлари сони у қадар кўпаймагани сабаб амалиёт ўтказадиган жойлар кам. Албатта, бунга ечим қидиряпмиз. Университет факультетлари қошида малакани шакллантирадиган марказлар очиляпти. Лекин ҳамма йўналишда ҳам буни қила олмаяпмиз. Масалан, иқтисодиёт йўналишида ўқийдиган талаба вазирлик ёки ҳокимиятга бориши керак. Ҳозир бу йўналишда икки мингдан ортиқ талабаларимиз бор. Худди шунақа Миллий, Молия, Шарқшунослик ва бошқа деярли барча университетларда менежмент, иқтисодиёт ва маректинг йўналишлари очилган. Давлат ташкилотлари уларнинг ҳаммасини сиғдириши қийин”, — деди университет раҳбари.
Аввалроқ Олий таълим, фан ва инновациялар вазирлиги департамент бошлиғи Абдували Холиқов “Дарё” мухбири билан суҳбатда Ўзбекистондаги олий таълим муассасалари битирувчиларининг 86 фоизи ўзи ўқиган соҳада ишлаётганини айтганди.
Изоҳ (0)