Shimoliy Koreya 12-iyul kuni uchirgan ballistik raketa Rossiyaning eksklyuziv iqtisodiy zonasiga qulagan, dedi Birlashgan Millatlar Tashkiloti bosh kotibi yordamchisi Xolid Xari tashkilot Xavfsizlik kengashi yig‘ilishida.
Xiarining so‘zlariga ko‘ra, raketa KXDR vaqt bilan soat 10:00 da (Toshkent vaqti bilan 08:00) Pxenyan tumanidan tikka trayektoriya bo‘ylab uchirilgan. U taxminan 1 000 kilometr masofani bosib o‘tgan va 6 648,4 kilometr balandlikka ko‘tarilgan, shundan so‘ng Rossiyaning eksklyuziv iqtisodiy zonasida dengizga qulagan, dedi bosh kotib yordamchisi.
“Maʼlumotlarga ko‘ra, parvoz taxminan 74 daqiqa davom etgan, bu KXDR tarixidagi eng uzun ballistik raketa parvozi bo‘lishi mumkin”, — dedi Xiari.
Shuningdek, u BMT bosh kotibi Antoniu Guterrish raketa uchirilishini qoralaganini qayd etdi.
12-iyul kuni Shimoliy Koreya uzoq masofali ballistik raketani sinovdan o‘tkazgani haqida Janubiy Koreya Qurolli kuchlari shtab boshliqlari qo‘mitasi hamda yaponiyalik harbiylar xabar qilgan edi, ammo ular raketa turiga aniqlik kiritmagan.
Ertasi kuni tarqatilgan Koreya markaziy axborot agentligi xabarida Shimoliy Koreya “Xvasonpxo-18” raketasini uchirgani aytildi. Sinovlarga shaxsan davlat rahbari Kim Chen In rahbarlik qilgan. Agentlik keltirgan masofa, balandlik va parvoz vaqtiga oid ma’lumotlar yuqorida keltirilgan raqamlarga o‘xshash. Koreya markaziy axborot agentligi raketa Sharqiy Koreya dengizi (Yapon dengizi) suvlariga qulaganini yozdi.
Bu “Xvasonpxo-18” raketasining ikkinchi sinovi, birinchisi 13-aprelda amalga oshirilgan, deya qayd etadi Yonhap. Sinovlar Pxenyanning Amerika razvedkachi samolyotlari mamlakat havo hududiga bostirib kirgani haqidagi da’volari fonida bo‘lib o‘tdi.
Izoh (0)