Шимолий Корея 12 июль куни учирган баллистик ракета Россиянинг эксклюзив иқтисодий зонасига қулаган, деди Бирлашган Миллатлар Ташкилоти бош котиби ёрдамчиси Холид Хари ташкилот Хавфсизлик кенгаши йиғилишида.
Хиарининг сўзларига кўра, ракета КХДР вақт билан соат 10:00 да (Тошкент вақти билан 08:00) Пхеньян туманидан тикка траектория бўйлаб учирилган. У тахминан 1 000 километр масофани босиб ўтган ва 6 648,4 километр баландликка кўтарилган, шундан сўнг Россиянинг эксклюзив иқтисодий зонасида денгизга қулаган, деди бош котиб ёрдамчиси.
“Маълумотларга кўра, парвоз тахминан 74 дақиқа давом этган, бу КХДР тарихидаги энг узун баллистик ракета парвози бўлиши мумкин”, — деди Хиари.
Шунингдек, у БМТ бош котиби Антониу Гутерриш ракета учирилишини қоралаганини қайд этди.
12 июль куни Шимолий Корея узоқ масофали баллистик ракетани синовдан ўтказгани ҳақида Жанубий Корея Қуролли кучлари штаб бошлиқлари қўмитаси ҳамда япониялик ҳарбийлар хабар қилган эди, аммо улар ракета турига аниқлик киритмаган.
Эртаси куни тарқатилган Корея марказий ахборот агентлиги хабарида Шимолий Корея “Хвасонпхо-18” ракетасини учиргани айтилди. Синовларга шахсан давлат раҳбари Ким Чен Ин раҳбарлик қилган. Агентлик келтирган масофа, баландлик ва парвоз вақтига оид маълумотлар юқорида келтирилган рақамларга ўхшаш. Корея марказий ахборот агентлиги ракета Шарқий Корея денгизи (Япон денгизи) сувларига қулаганини ёзди.
Бу “Хвасонпхо-18” ракетасининг иккинчи синови, биринчиси 13 апрелда амалга оширилган, дея қайд этади Yonhap. Синовлар Пхеньян нинг Америка разведкачи самолётлари мамлакат ҳаво ҳудудига бостириб киргани ҳақидаги даъволари фонида бўлиб ўтди.
Изоҳ (0)