O‘zbekiston Savdo-sanoat palatasi raisi o‘rinbosari Jamshid O‘roqov, Misr Tadbirkorlar uyushmasi direktori Muhammad Yusuf va Misrning O‘zbekistondagi favqulodda va muxtor elchisi Amira Fahmi o‘rtasida uchrashuv bo‘lib o‘tdi. Bu haqda SSP matbuot xizmati xabar berdi.
Qayd etilishicha, uchrashuvda ikki mamlakat o‘rtasidagi hamkorlik aloqalarini rivojlantirish masalalari muhokama qilingan, xususan, O‘zbekiston qishloq xo‘jaligi, tekstil va turizm sohalarida hamkorlikka tayyor ekani haqida ta‘kidlangan.
Shuningdek, uchrashuv davomida O‘zbekiston Savdo-sanoat palatasining faoliyati va vazifalari bilan tanishtirilgan. Misr Tadbirkorlar uyushmasi direktori Muhammad Yusuf O‘zbekistondagi zargarlik sanoati sohasini rivojlantirish hamda tajriba almashish maqsadida o‘zbekistonlik zargarlarning Misrga tashrifini tashkillashtirish taklifini bildirgan.
Uchrashuvda O‘zbekiston va Misr o‘rtasidagi iqtisodiy aloqalarni mustahkamlash maqsadida biznes-forum o‘tkazish imkoniyatlari ham muhokama qilingan.
O‘zbekistonda zargarlik faoliyati
Prezidentning aprel oyidagi qaroriga asosan O‘zbekistonda zargarlik ishi yo‘nalishi bo‘yicha maxsus o‘quv kurslarini muvaffaqiyatli tugatib, sertifikat olgan shaxslarga zargarlik buyumlari ishlab chiqarish uchun zarur bo‘lgan jihozlar va asbob-uskunalar sotib olish uchun 50 million so‘mgacha garovsiz kreditlar berilishi yo‘lga qo‘yilgan. O‘zbekiston Malayziyaga zargarlik mahsulotlarini eksport qilishni boshlashi to‘g‘risida xabar berilgandi.
Izoh (0)