“O‘zbekzargarsanoati” uyushmasi va Malayziyaning Rafahia Holdings Berhad kompaniyasi rahbariyati o‘rtasida onlayn uchrashuv tashkil  etildi. Bu haqda “Dunyo” agentligi xabar berdi.

Muloqot avvalida Malayziya tomoniga “O‘zbekzargarsanoati” uyushmasi va uning tarkibidagi korxonalar, mamlakatda zargarlik mahsulotlari ishlab chiqarish, ularni eksport qilish tartibi, sohani yanada rivojlantirish bo‘yicha qabul qilingan qaror va farmonlar haqida batafsil maʼlumot berilgan.

Shuningdek, tomonlar zargarlik mahsulotlarini O‘zbekistondan eksport qilishda bojxona bojlari, transport logistika xizmatlari, zargarlik bo‘yicha qo‘shma investitsiya loyihalarini amalga oshirish imkoniyatlarini muhokama qilgan

Malayziya tomoni zargarlik mahsulotlarini xarid qilishda “O‘zbekzargarsanoati” uyushmasi va uning tarkibidagi korxonalar bilan hamkorlik qilishdan manfaatdorligini bildirgan.

Bo‘lib o‘tgan samarali muzokalar natijasida Rafahia Holdings Berhad kompaniyasi rahbariyatining O‘zbekistonga ishchi safarini tashkil etish va tashrif davomida zargarlik korxonalari faoliyati bilan tanishish, zargarlik mahsulotlari ishlab chiqarish loyihasini amalga oshirish imkoniyatlarini o‘rganish bo‘yicha uchrashuvlar o‘tkazish bo‘yicha kelishib olingan.

Rafahia Holdings Berhad kompaniyasi 2011-yilda tashkil etilgan bo‘lib, zargarlik mahsulotlari savdosi bilan shug‘ullanadi. Shuningdek, kompaniya turizm, aviatsiya va qishloq xo‘jaligi yo‘nalishlarida ham faoliyat yuritadi.

Prezidentning aprel oyidagi qaroriga asosan O‘zbekistonda zargarlik ishi yo‘nalishi bo‘yicha maxsus o‘quv kurslarini muvaffaqiyatli tugatib, sertifikat olgan shaxslarga zargarlik buyumlari ishlab chiqarish uchun zarur bo‘lgan jihozlar va asbob-uskunalar sotib olish uchun 50 million so‘mgacha garovsiz kreditlar berilishi yo‘lga qo‘yilgan.