“O‘zaviatsiya” agentligi Rossiya tomoni bilan reyslar sonini oshirish bo‘yicha muzokaralar o‘tkazilgani aytilgan xabarlarni rad etdi. Bu haqda agentlik matbuot xizmati xabar berdi.
Rossiyaning “Vedomosti” nashri o‘z manbalariga tayanib, O‘zbekiston Rossiya aviatsiya hukumatiga aviaqatnovlar sonini oshirishni taklif qilgani haqida yozgandi. Xususan, gap Moskva va Toshkent o‘rtasidagi reyslarni 25 tadan 50 taga chiqarish haqida ketgan.
O‘z navbatida “O‘zaviatsiya” agentligi mazkur ma’lumotni rad etdi.
“Ayrim ommaviy axborot vositalarida ‘O‘zaviatsiya’ agentligi Rossiya aviatsiya ma’muriyatiga mamlakatlar o‘rtasidagi haftalik reyslar sonini ko‘paytirishni taklif qilgani haqida ma’lumotlar tarqaldi. Ushbu ma’lumot haqiqatga to‘g‘ri kelmaydi”, — deyiladi munosabatda.
Shuningdek, agentlik O‘zbekiston ommaviy axborot vositalaridan vakolatli davlat organlari tomonidan berilgan rasmiy ma’lumotlarni e’lon etishlarini qat’iy tavsiya qilgan.
5-may kuni Checheniston hukumati raisi Muslim Xuchiyev Uzbekistan Airways’ning Rossiyadagi mintaqaviy vakili Z.Abudullayev bilan uchrashuvda yangi xalqaro reysni yo‘lga qo‘yish va parvozlar geografiyasini yanada kengaytirish masalalarini muhokama qilgandi.
O‘shanda Xuchiyev Toshkent va Grozniy o‘rtasida muntazam parvozlar Checheniston va O‘zbekiston o‘rtasidagi yo‘lovchi tashish hajmini oshirishga xizmat qilishi va mintaqa iqtisodiyoti rivojiga qo‘shimcha turtki berishini aytgan. Toshkent—Grozniy—Toshkent yo‘nalishi bo‘yicha muntazam parvozlar Uzbekistan Airways samolyotlarida 26-iyundan boshlangan.
Izoh (0)